Politoloq: Cənubi Qafqazda qlobal aktorların maraq dairəsi xeyli genişlənib
Bakı, 11 iyun, AZƏRTAC
Trans-Xəzər Forumu ABŞ-nin Mərkəzi Asiya və Cənubi Qafqaz ölkələri ilə münasibətlərinə dair geniş mövzuları əhatə edən mühüm tədbirdir və bu sahədə Azərbaycanın xüsusi yeri var. Azərbaycan Prezidentinin köməkçisi Hikmət Hacıyevin çıxışı diqqəti cəlb etdi. O, ölkəmizin regiondakı rolunun və əhəmiyyətinin artdığını qeyd etdi. Bu, bizə təkcə qonşularımızla deyil, həm də əməkdaşlığa artan maraq göstərən digər ölkələrlə balanslı və konstruktiv münasibətlər qurmağa imkan verir.
Bu fikirləri AZƏRTAC-a açıqlamasında Xəzər Siyasət Mərkəzinin təşkilatçılığı ilə Vaşinqtonda keçirilən ənənəvi Trans-Xəzər Forumunun nəticələrini şərh edən azərbaycanlı politoloq İlqar Vəlizadə bildirib.
Agentliyin müsahibi Cənubi Qafqazda müxtəlif ölkələrin maraqlarının olduğunu vurğulayaraq bildirib: “Bizim üçün ən vacibi odur ki, onların regionumuzda maraqları toqquşmasın, əksinə, iqtisadi inkişafı təşviq etsin, onu sülh və sabitlik zonasına çevirsin”.
Politoloq qeyd edib: “Coğrafiyamızda xarici aktorların maraqlarının üst-üstə düşməsi Azərbaycanın xarici siyasət strategiyasının əsasını təşkil edir. Azərbaycan Prezidenti vurğulayıb ki, bu gün biz imkanlardan səmərəli istifadə etməyə, regionumuzdakı siyasi və iqtisadi mənzərəni dəyişdirməyə, sülhü, sabitliyi və rifahı möhkəmləndirməyə çalışırıq. Bu, çox vacibdir. Çünki hazırda bir çox coğrafi məkanda münaqişələr və müharibələr davam edir. Bu geosiyasi toqquşmaların regionumuza yayılmasının qarşısını almaq bizim üçün vacibdir”.
İ. Vəlizadənin sözlərinə görə, bu şərtlər altında Orta Dəhlizin inkişafı xüsusilə əhəmiyyətlidir: “Nəqliyyat və enerji layihələrini həyata keçirməklə, biz təkcə öz milli strateji maraqlarımızı təmin etmirik, həm də sayı daim artan tərəfdaşlarımızın, müttəfiqlərimizin və dostlarımızın maraqlarını nəzərə alırıq. Bu mesajlar Azərbaycan Prezidentinin köməkçisinin, eləcə də forumun digər iştirakçılarının çıxışlarında aydın şəkildə çatdırılıb və onlar Azərbaycanın maraqlarının həmin ölkələr üçün artan əhəmiyyətini vurğulayıblar”.
Politoloq vurğulayıb ki, əvvəllər regionumuza yalnız enerji təhlükəsizliyi prizmasından baxılırdı, amma bu gün qlobal aktorlar üçün maraq doğuran mövzuların dairəsi xeyli genişlənib. “İndi regionumuzun yeni təchizat zəncirləri yaratması ilə bağlı getdikcə daha çox söhbət gedir. Bu, Avropa və ABŞ-ni vacib xammal və minerallarla təchiz etmək üçün alternativlərin təmin edilməsi baxımından çox vacibdir. Azərbaycanın özü üçün ən vacib məsələ ticarətin, iqtisadi və investisiya münasibətlərinin şaxələndirilməsi olaraq qalır”, - deyə o qeyd edib.
İ. Vəlizadənin sözlərinə görə, Azərbaycan böyük geosiyasi layihələrdə iştirak etmir və digər dövlətlərin maraqlarına qarşı çıxmır. “Bizim üçün vacib olan regionda xarici aktorların marağının yeni bölücü xətlərin yaranmasına səbəb olmaması amilidir. Regionumuz sülh, sabitlik və rifah məkanıdır. Onun keyfiyyəti və dəyəri də elə bundan ibarətdir. Azərbaycanın və onun ən yaxın qonşularının yürütdüyü siyasət sayəsində biz bu vacib resursu - regionun sabitliyini və proqnozlaşdırıla bilənliyini təmin edə bilmişik”, -deyə politoloq sözlərini yekunlaşdırıb.
Müəllif – Leyla Muradzadə
Bölmənin digər xəbərləri
