20 Yanvar - xalqımızın faciə və qəhrəmanlıq günü
Bakı, 18 yanvar, AZƏRTAC
Azərbaycan Dövlət Pedaqoji Universitetində (ADPU) 20 Yanvar faciəsinin iyirmi səkkizinci ildönümünə həsr edilmiş anım mərasimi keçirilib.
ADPU-dan AZƏRTAC-a bildirilib ki, əvvəlcə tədbir iştirakçıları 20 Yanvar faciəsi ilə bağlı kitablardan ibarət sərgi ilə tanış olublar. Sonra 20 Yanvar şəhidlərinin xatirəsi bir dəqiqəlik sükutla yad edilib.
ADPU-nun rektoru, professor Cəfər Cəfərov Qanlı Yanvar hadisələrindən danışıb. Bildirilib ki, 20 Yanvar faciəsindən 28 il keçsə də, xalqımız şəhidlərin xatirəsini həmişə əziz tutur. Ümummilli lider Heydər Əliyevin 20 Yanvar hadisələrinə siyasi-hüquqi qiymət verdiyi vurğulanıb.
Tədbirdə fiziki tərbiyə və çağırışaqədərki hazırlığın tədrisi metodikası kafedrasının baş müəllimi, ehtiyatda olan kapitan Natiq Əliyev məruzə ilə çıxış edib. Məruzədə qeyd olunub ki, ADPU-nun müəllim və tələbələri ümumxalq hərəkatında fəal iştirak ediblər. Eyni zamanda, universitetin məzunları və tələbələri ölkəmizin ərazi bütövlüyü və dövlət müstəqilliyi uğrunda gedən döyüşlərdə qəhrəmancasına döyüşüblər. ADPU-nun 18 şəhidi var. Onlardan ikisi Azərbaycanın Milli Qəhrəmanı adına, bir nəfəri isə “Azərbaycan Bayrağı” ordeninə layiq görülüb.
Filologiya fakültəsinin dekanı Buludxan Xəlilov, professorlar Himalay Qasımov və Zahid Xəlil şahidi olduqları hadisələr barədə məlumat verərək 20 Yanvar tarixini xalqımızın faciə və qəhrəmanlıq günü kimi səciyyələndiriblər.
Tədbirdə 20 Yanvar hadisələrinə həsr olunmuş videoçarx nümayiş etdirilib.
Bölmənin digər xəbərləri
