20 Yanvar şəhidlərinin xatirəsi İsveçdə anılıb
Stokholm, 19 yanvar, AZƏRTAC
Azərbaycanın İsveçdəki səfirliyi Stokholmda 20 Yanvar faciəsinin 28-ci ildönümü ilə bağlı tədbir təşkil edib.
Tədbiri açan Azərbaycanın İsveçdəki səfiri Adış Məmmədov 20 Yanvar hadisələri barədə ətraflı danışıb.
Azərbaycanda erməni separatizminin baş qaldırmasının Vətənin ərazi bütövlüyünü müdafiə edən xalqı ayağa qaldırdığını, bunun nəticəsində milli müstəqillik ideyalarının formalaşdığını və milli azadlıq hərəkatının genişləndiyini, Kremlin bu hərəkatı qanda boğmaq istədiyini qeyd edən Adış Məmmədov deyib: “Həmin gecə xalqımızın müstəqillik ruhunu sındırmaq istəyən qüvvələr ölkəsinin, xalqının azadlığını, şərəf və ləyaqətini hər şeydən uca tutan vətənpərvər Azərbaycan övladlarını qarşılarında gördülər. Bu müdhiş gecədə Azərbaycanın igid və qorxmaz oğul və qızları Vətənin azadlığı və müstəqilliyi uğrunda öz canlarından keçərək şəhidlik zirvəsinə ucaldılar”.
Məhz buna görə də 20 Yanvarın Azərbaycan tarixinin ən şərəfli səhifələrindən biri olduğunu bildirən səfir 20 Yanvar şəhidlərinin Vətənin azadlığı və müstəqilliyi uğrunda öz canlarından keçməklə gələcək nəsillər üçün də bir simvol, bir örnək olduqlarını qeyd edib.
Adış Məmmədov həmin vaxt Moskvada yaşayan ümummilli lider Heydər Əliyevin öz həyatını riskə ataraq cəsarətlə Qanlı Yanvar qırğınını törədənləri pisləyən kəskin bəyanatla çıxış etdiyini xatırladaraq, xalqımızın başına gətirilən müsibətin dünya ictimaiyyətinə çatdırılmasında dahi şəxsiyyətin rolunu qeyd edib, o günlər Heydər Əliyevin informasiya blokadasına alınmış və faciənin ağrısını yaşayan Azərbaycanın ümid yeri olduğunu vurğulayıb. Adış Məmmədov ulu öndər Heydər Əliyevin yenidən hakimiyyətə gəlişindən sonra 20 Yanvar hadisələrinə siyasi-hüquqi qiymət verildiyini və bu cinayəti törədənlərin adlarının ictimaiyyətə açıqlandığını bildirib.
Qanlı hadisələrdən 28 il keçməsinə baxmayaraq, xalqımızın o müdhiş gecəni daim xatırladığını, hər il yanvarın 20-də on minlərlə insanın Şəhidlər xiyabanını ziyarət etdiyini, Vətənin azadlığı və suverenliyi uğrunda şəhid olaraq qəhrəmanlıq salnaməsini yazan oğul və qızlarımızın əziz xatirəsini ehtiramla yad etdiyini qeyd edən səfir şəhidlərin əziz xatirəsinin Azərbaycan xalqının qəlbində əbədi yaşayacağını vurğulayıb.
Daha sonra çıxış edən tədbirin iştirakçıları Rəhim Sadıxbəyli və Səttar Sevgin 20 Yanvar faciəsi barədə xatirələrini bölüşüblər. Çıxış edənlər deyiblər ki, baş verən qanlı hadisələrə baxmayaraq, Azərbaycan xalqının iradəsini və azadlıq eşqini qırmaq mümkün olmayıb. Qanı bahasına olsa da nəticədə Azərbaycan xalqı öz istəyinə - azadlıq və müstəqilliyə qovuşub.
Sonda tədbir iştirakçılarına Qanlı Yanvar faciəsi barədə sənədli film nümayiş olunub.
Qeyd edək ki, Azərbaycanın İsveçdəki və eyni zamanda, Norveç və Finlandiyadakı səfirliyi 20 Yanvar hadisələri barədə həqiqətləri çatdırmaq məqsədilə adıçəkilən ölkələrin dövlət, hökumət nümayəndələrinə, parlament üzvlərinə, yerli QHT və KİV-lərə, habelə diplomatik nümayəndəliklərə 20 Yanvar faciəsinin ildönümü ilə əlaqədar rəsmi press-reliz göndərib.
Rauf Əliyev
AZƏRTAC-ın xüsusi müxbiri
Stokholm
Bölmənin digər xəbərləri
