46-cı Beynəlxalq Qahirə Film Festivalı keçiriləcək
Qahirə, 16 oktyabr, AZƏRTAC
Noyabrın 12-də 46-cı Beynəlxalq Qahirə Film Festivalının açılışı olacaq.
AZƏRTAC xəbər verir ki, Yaxın Şərq və Afrikada ən populyar olan festivala 50 dövlətdən 130 film təqdim olunub.
Festival çərçivəsində keçiriləcək beynəlxalq müsabiqədə 12 film iştirak edəcək. Müsabiqədənkənar rəsmi bölmədə isə müxtəlif kino məktəblərinə aid 11 filmin nümayişi baş tutacaq.Bundan başqa, beynəlxalq kino tədbiri çərçivəsində “Ərəb kinosunun üfüqləri” bölməsində 9 film nümayiş olunur. Eyni zamanda, bu kontekstdə 13 seçilmiş film təqdim ediləcək.
Beynəlxalq Kino Tənqidçiləri Həftəsi müsabiqəsində 8 film iştirak edəcək. Qısa filmlər müsabiqəsində isə 19 film yarışacaq.
Festival çərçivəsində, həmçinin “Qahirə klassikləri” proqramında 5 film, eləcə də “Bərpa olunmuş Misir klassikləri” proqramında 24 film təqdim ediləcək.
Festivalın budəfəki buraxılışı çərçivəsində 10-cu "Qahirə film forumu" keçiriləcək. Forumda film istehsalı, maliyyələşmə və yayım sahələrində tanınmış beynəlxalq simalar iştirak edəcək.
Noyabrın 21-də başa çatacaq festivalda Avropa və Yaxın Şərq ölkələri kinematoqrafçılarının 2024-cü ildə lentə aldıqları tammetrajlı və qısametrajlı filmlər nümayiş etdiriləcək. Jüri ən yaxşı film, rejissor, aktyor və aktrisa nominasiyaları üzrə qalibləri müəyyən edəcək.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
