ELM VƏ TƏHSİL
500-dən çox bal toplayan 1563 tələbə Bakı Dövlət Universitetini seçib
Bakı, 16 sentyabr, AZƏRTAC
Bakı Dövlət Universitetində (BDU) “Bilik günü” qeyd olunub.
AZƏRTAC xəbər verir ki, tədbir hərbi orkestrin ifasında Azərbaycan Respublikasının dövlət himninin səsləndirilməsi ilə başlanıb.
BDU-nun rektoru Elçin Babayev Azərbaycan ali təhsil ocaqlarının flaqmanı olan 100 yaşlı universitetin birinci kurs tələbələrini və onun nəzdində fəaliyyət göstərən “Gənc istedadlar” liseyinə qəbul olunan şagirdləri təbrik edib.
“Siz həyatınızın mühüm bir mərhələsinə qədəm qoyursunuz. Universitetin 100 yaşının tamam olduğu ildə onun bir üzvünə çevrilirsiniz. Bunu sonralar dəyərləndirəcək, xatirələrinizdə yaşadacaqsınız”, - deyən rektor tələbələrə universitetdə onlar üçün yaradılan şəraitdən səmərəli istifadə etmələrini tövsiyə edib.
Rektor tələbələrin təhsilə başladıqları bu gündən etibarən savadlı, bilikli, elmli, bacarıqlı bir mütəxəssis kimi yetişəcəklərinə, ölkəmizin tərəqqisində, cəmiyyətin inkişafında mühüm rol oynayacaqlarına, fəaliyyətlərində vətənpərvərlik və dövlətçilik prinsiplərini əsas tutacaqlarına, Bakı Dövlət Universitetinin adına hər zaman şərəf və şöhrət gətirəcəklərinə əminliyini ifadə edib.
Elçin Babayev universitetin respublikamız və əksər dövlətlər üçün yüksəkixtisaslı mütəxəssis hazırladığını vurğulayıb. Bu məzunlar arasında dünya elminə, mədəniyyətinə, siyasətinə təsir göstərmək qüdrətinə malik yüzlərlə tarixi şəxsiyyətlər arasında ümummilli lider Heydər Əliyevin xüsusi yer tutduğunu diqqətə çatdırıb.
Noyabr ayında Bakı Dövlət Universitetinin 100 illik yubileyinin dövlət səviyyəsində qeyd ediləcəyini bildirən rektor yubiley tədbirlərinin indiyədək UNESKO-nun Parisdəki Baş Qərargahında və Azərbaycanın Avstriyadakı səfirliyinin tabeliyində fəaliyyət göstərən Mədəniyyət Mərkəzində təşkil edildiyini, çoxsaylı elmi, mədəni, kütləvi tədbirlər keçirilməsinin nəzərdə tutulduğunu deyib.
Bu il ölkə üzrə ali təhsil müəssisələrinə keçirilən qəbul imtahanlarından danışan rektor ən çox tələbə qəbulunun Bakı Dövlət Universitetinin payına düşdüyünü, Qazax filialı da daxil olmaqla ali təhsilin bakalavr və magistratura səviyyələri üzrə BDU-ya qəbul olunanların ümumi sayının 6 min 462 nəfər təşkil etdiyini bildirib. Elçin Babayev diqqətə çatdırıb ki, tələbələrdən 5 min 127-si bakalavr səviyyəsinə, 550-si Qazax filialına, 785 tələbə isə magistraturaya qəbul olunub. Qəbul imtahanı verən abituriyentlərdən 500-dən çox bal toplayan 1563 nəfəri Bakı Dövlət Universitetini seçib.
“Gənc istedadlar” liseyi haqqında məlumat verən rektor Elçin Babayev deyib ki, bu il liseyi bitirən 48 məzundan 16-sı 600-dən yuxarı bal toplayıb, 3 nəfər Prezident təqaüdünə, 6 nəfər qızıl, 1 nəfər gümüş medala, 6 nəfər fərqlənmə attestatına layiq görülüb.
Tədbirdə BDU-nun professor-müəllim heyəti adından professor Ülviyyə Həsənova, tələbələr adından isə Tarix fakültəsinin tələbəsi Jalə Vəliyeva çıxış ediblər.
Sonra hər fakültədən ən yüksək bal toplamış 2 tələbəyə tələbə vəsiqəsi və korporativ elektron poçt ünvanı, YAP Yasamal rayon təşkilatı tərəfindən 660 baldan yuxarı nəticə göstərmiş 33 tələbəyə hədiyyə təqdim edilib.
“Bilik günü” rektorun birinci kurs tələbələri ilə universitetin həyətində çiçək əkilməsi mərasimi ilə başa çatıb.