Aysel Hüseynova: Möminə xatun türbəsi orta əsr Şərq memarlığının nadir sənət nümunəsidir
Bakı, 12 avqust, AZƏRTAC
Möminə xatun türbəsi Azərbaycanın orta əsr memarlığının ən möhtəşəm nümunələrindən, böyük memar Əcəmi Naxçıvaninin şah əsərlərindən biridir. Türbənin memarlıq quruluşu və bədii tərtibatı Əcəmi Naxçıvaninin yüksək sənətkarlıq məharətini nümayiş etdirir.
Bunu AZƏRTAC-a açıqlamasında memar Aysel Hüseynova deyib.
O bildirib ki, onüzlü monumental gövdəsi, mürəkkəb həndəsi ornamentləri, kufi kitabələri, firuzəyi kaşı işləmələri və daxili günbəzdəki medalyonlar Möminə xatun türbəsini orta əsr Şərq memarlığının nadir sənət nümunələrindən birinə çevirir.
“Möminə xatun türbəsinin əhəmiyyəti yalnız onun memarlıq xüsusiyyətləri ilə məhdudlaşmır. Abidə Azərbaycanın qədim dövlətçilik ənənələrinin, yüksək mədəniyyətinin və Naxçıvanda formalaşmış zəngin memarlıq məktəbinin mühüm maddi ifadəsidir. Bu baxımdan Möminə xatun türbəsinin qorunması və gələcək nəsillərə çatdırılması milli-mədəni irsimizin mühafizəsi baxımından xüsusi əhəmiyyət daşıyır”, - deyə memar bildirib.
Bölmənin digər xəbərləri
