Moldova hökuməti Dnestr çayının dayazlaşması ilə əlaqədar fövqəladə vəziyyətin tətbiqini təsdiqləyib
Bakı, 22 sentyabr, AZƏRTAC
Artıq xəbər verildiyi kimi, sentyabrın 22-də Moldovada parlament enerji və hidroloji sektorlarda fövqəladə vəziyyət elan edilməsi ilə bağlı qərarla əlaqədar təcili iclasa toplaşacaq.
AZƏRTAC xəbər verir ki, Moldova hökuməti sentyabrın 22-də keçirilmiş iclasda enerji və hidroloji sektorlarda 60 gün müddətinə fövqəladə vəziyyətin tətbiqini təsdiqləyib.
“Fövqəladə vəziyyətin tətbiqi zərurət yarandıqda enerji daşıyıcıları və yanacaq ehtiyatlarının təmin edilməsi və idxalı, istehlakçıların və kritik infrastrukturun qorunması, su və enerji təchizatının fasiləsizliyinin təmin edilməsi üçün müvəqqəti tədbirlər görməyə imkan verəcək”, - deyə Milli Böhranların İdarəolunması Mərkəzinin baş direktoru Sergey Dyakonu bildirib.
Ölkədə Dnestr və Prut çaylarında ciddi hidroloji qıtlıq müşahidə olunur. Suyun səviyyəsinin aşağı olması sugötürmə imkanlarına və nəticə etibarilə əhalinin içməli su ilə təminatına təsir göstərə bilər.
Energetika naziri Dorin Junqietu bildirib ki, rəhbərlik etdiyi qurumun qiymətləndirmələrinə əsasən, yaxın vaxtlarda istehlakçıların ödəyəcəyi tariflərin artması ilə bağlı ciddi risk var. Bu artım əhəmiyyətli ola və ailə büdcələrinə təzyiq göstərə bilər.
Yay aylarında Moldova qonşu Rumıniyada elektrik enerjisi istehsalı ilə bağlı problemlə üzləşib. Buna səbəb Dunay çayının suyunun səviyyəsinin kəskin aşağı düşməsi olub. Dnestr isə ölkənin əsas su təchizatı mənbəyidir.
Bölmənin digər xəbərləri
