Bakıda keçirilən atletika üzrə Avropa təsnifat turnirinin ilk günündə dörd növ üzrə qaliblər müəyyənləşmişdir VİDEO
Bakı, 30 may (AZƏRTAC). Mayın 30-da Tofiq Bəhramov adına Respublika Stadionunda atletika üzrə yeniyetmələr arasında Avropa təsnifat turniri başlamışdır.
AZƏRTAC xəbər verir ki, turnir atletikanın 18 növü üzrə keçirilir və Çinin Nancinq şəhərində təşkil olunacaq yeniyetmələrin II Olimpiya Oyunlarına lisenziya xarakteri daşıyır.
Avropa təsnifat turnirdə 38 ölkədən 690 atlet birincilik uğrunda mübarizə aparır. Bunlardan 333-ü qız, 357-si isə oğlan atletdir. Lisenziyaların sayı oğlanlar üçün 82, qızlar üçün 108 olacaqdır.
Turnirin ilk günü 5 min metr məsafəyə qızlar arasında idman yürüşü yarışlarının qalibi müəyyənləşmişdir. İtaliya təmsilçisi Noemi Stella 23 dəqiqə 31 saniyə göstərici ilə turnirin qalibi olmuş və Çində keçiriləcək II Olimpiya Oyunlarına vəsiqə qazanmışdır. Rusiyalı Yana Smerdova gümüş, İspaniya təmsilçisi İrene Vasquez bürünc medala sahib olmuşlar.
Qızlar arasında 2 min metr məsafəyə qaçış yarışlarında İtaliya atleti Nikole Reina qızıl medal qazanmışdır. O, 6 dəqiqə 42.15 saniyə göstərici ilə Avropa rekordunu yeniləmişdir. Macarıstanlı Lili Anna Toth gümüş, Fransa atleti Lea Navarro isə bürünc medala sahib olmuşlar. Hər iki atlet şəxsi rekordunu təzələmişdir.
Qızlar arasında 100 metr məsafəyə qaçış yarışlarında Polşa təmsilçisi Yeva Svoboda fəxri kürsünün ən yüksək pilləsinə qalxmışdır. Paraskevi Andreou (Kipr) gümüş, Kristina Sevkova (Rusiya) bürünc medala sahib olmuşlar.
Oğlanların 100 metr məsafəyə qaçış yarışlarında danimarkalı Kristoffer Hari birinci yeri tutmuşdur. İspaniyalı Aitor Same Ekobo gümüş, italiyalı Fillippo Tortu bürünc medala sahib olmuşlar.
Bölmənin digər xəbərləri
