Bakı, 31 may (AZƏRTAC). İyunun 7-də Azərbaycanda ilk dəfə ümummilli lider Heydər Əliyevin xatirəsinə həsr olunmuş milli qolf turniri keçiriləcəkdir.

Azərbaycan Qolf Federasiyasından AZƏRTAC-a bildirmişlər ki, Qubadakı Milli Qolf Klubunda təşkil olunacaq turnirin əsas məqsədi qolf oynamağı bacaran yerli və əcnəbilər üçün maraqlı, rəqabətli yarış təşkil etməkdir. Eyni zamanda, ölkəmiz üçün yeni olan bu idman növünün əhatə dairəsini genişləndirmək və Azərbaycanı yeni qolf məkanı kimi dünyaya təqdim etməkdir.

Turnir 18 dəlikli “Mixed stroke play” formatında keçiriləcəkdir. Yarışda müxtəlif “handicap” göstəricisinə malik olan həvəskar qolfçular iştirak edəcəklər.