Orta ixtisas təhsili müəssisələrinin boş qalan plan yerlərinə müsabiqə elan edilir VİDEO
Bakı, 31 iyul (AZƏRTAC). Tələbə Qəbulu üzrə Dövlət Komissiyası (TQDK) 2014/2015-ci tədris ili üçün ümumi orta təhsil bazasında (IX illik) orta ixtisas təhsili müəssisələrinin boş qalan plan yerlərinə müsabiqə elan edir.
Tələbə Qəbulu üzrə Dövlət Komissiyasından AZƏRTAC-a bildiriblər ki, müsabiqə ümumi orta təhsil bazasında orta ixtisas təhsili müəssisələrinə keçirilmiş qəbul və ya IX siniflər üzrə buraxılış imtahanında toplanılan ballar əsasında aparılır.
İxtisas seçiminə ümumi balı 16-dan və hər bir fənn üzrə balı 8-dən az olmayan və orta ixtisas təhsili müəssisələrinə qəbul olmayan və ya qəbul olduğu təhsil müəssisəsində müəyyən olunmuş vaxtda qeydiyyatdan keçməyən abituriyentlər buraxılırlar.
Orta ixtisas təhsili müəssisələrinə qəbul olub qeydiyyatdan keçən abituriyentlərin boş qalan plan yerlərinə keçirilən müsabiqədə iştirak etmək hüququ yoxdur.
İxtisas seçimi avqustun 4-ü saat 10.00-dan avqustun 11-i saat 10.00-dək internet vasitəsilə aparılacaq. İxtisas seçmək hüququ olan abituriyent orta ixtisas təhsili müəssisələrinin dövlət hesabına və ödənişli əsaslarla olan 12-yə qədər ixtisas kodunu seçib TQDK-nın internet saytında yerləşən “Abituriyentin elektron ixtisas seçimi ərizəsi”ni doldurmalı və təsdiqləməlidir.
İxtisas kodlarının ardıcıllığını abituriyent özü müəyyənləşdirir. Müsabiqə zamanı həmin ardıcıllıq hüquqi əsas kimi nəzərə alınır və abituriyent müsabiqədən keçdiyi ixtisasların birincisinə yerləşdirilir.
Müvafiq ixtisasların siyahısı “Abituriyent” jurnalının xüsusi buraxılışında təqdim olunub.
İxtisaslar siyahısında xüsusi qabiliyyət tələb edən ixtisaslar ulduz «*» işarəsi ilə qeyd olunub. Bu ixtisasları yalnız TQDK tərəfindən yaradılmış müvafiq Qeydiyyat Komissiyasında bu il mayın 19-dan 29-dək qeydiyyatdan keçmiş abituriyentlər seçə bilərlər.
Təsviri sənət, Teatr, kino və xoreoqrafiya sənətləri istiqamətlərinin ixtisaslarını və Musiqi sənəti istiqamətinin “Xanəndəlik” ixtisasını yalnız iyulun 2-dən 5-dək keçirilmiş seçmə tur zamanı müvafiq yoxlamadan “məqbul” almış abituriyentlər seçə bilərlər.
Abituriyentlər xüsusi qabiliyyət tələb edən ixtisaslarla yanaşı, digər ixtisasları da seçə bilərlər.
Müəyyən olunmuş müddətdə elektron ərizəsini təsdiqləməyən abituriyentlər müsabiqəyə buraxılmayacaqlar.
Bölmənin digər xəbərləri
