Qusar rayonunun Hil və Bədirqala kəndlərində yeni məktəb binaları istifadəyə verilib VİDEO
Qusar, 9 mart, Elxan Yusifli, AZƏRTAC
Martın 9-da Qusar rayonunun Hil və Bədirqala kəndlərində yeni inşa olunan məktəb binaları istifadəyə verilib.
AZƏRTAC xəbər verir ki, açılış mərasimlərindən əvvəl Azərbaycan xalqının ümummilli lideri Heydər Əliyevin xatirəsi dərin ehtiramla yad olunub, Ulu Öndərin Qusar şəhərində ucaldılan abidəsi önünə gül dəstələri düzülüb.
Sonra Hil kəndində 180 şagird yerlik yeni məktəb binasının açılış mərasimi keçirilib.
Mərasimdə iştirak edən təhsil naziri Mikayıl Cabbarov pedaqoji kollektivi və yerli sakinləri təbrik edərək ölkəmizdə aparılan təhsil islahatları haqqında ətraflı məlumat verib. Nazir bildirib ki, son 11 il ərzində Azərbaycanda 3000-ə yaxın ümumtəhsil müəssisəsi tikilib və ya əsaslı təmir olunub. Bu isə ölkə rəhbərliyinin təhsilə olan xüsusi diqqət və qayğısının göstəricisidir.
Məlumat verilib ki, Hil kənd tam orta məktəbinin yeni istifadəyə verilən ikimərtəbəli binasında 11 sinif otağı ilə yanaşı, iki laboratoriya, gənclərin çağırışaqədər hazırlığı, əmək təlimi, kompyuter və başqa otaqlar da var. Təhsil ocağının kollektivi tibb məntəqəsi, bufet, kitabxana, akt və idman zallarından da yararlana biləcəklər. Məktəbin binasında videomüşahidə, yanğın əleyhinə siqnalizasiya sistemləri quraşdırılıb, internet və telefon xətləri çəkilib, qazanxana istifadəyə verilib.
Açılış mərasimində çıxış edənlər yeni məktəblərin inşasının təhsilin keyfiyyətinin yüksəldilməsinə əhəmiyyətli təsir etdiyini vurğulayıblar.
Məktəbin müəllimləri çıxışlarında yeni tikilən təhsil ocağının kənd ictimaiyyəti üçün böyük hədiyyə olduğunu bildirib və buna görə ölkə rəhbərliyinə təşəkkür ediblər.
Növbəti açılış mərasimi isə Qusar rayonunun Bədirqala kəndində keçirilib. Yeni məktəbin rəmzi açılışı bildirən qırmızı lent kəsildikdən sonra qonaqlar məktəb binası ilə tanış olublar.
Məlumat verilib ki, məktəbin 1947-ci ildə tikilən əvvəlki birmərtəbəli binası uzun müddət istismar olunduğundan istifadəyə yararsız vəziyyətə düşmüşdü. Ötən il Təhsil Nazirliyi tərəfindən məktəbin köhnə binasının yerində yenisinin inşasına başlanılıb və tikinti işləri nəzərdə tutulan müddətdə başa çatdırılıb.
Mərasim iştirakçıları məktəbdə şagirdlər üçün yaradılan şəraitlə tanış olub, siniflərə, idman zalına, laboratoriyaya baxıblar. Yeni məktəbdə 11 sinif otağı, bir ümumi laboratoriya, müəllimlər, kompüter və texniki otaqları eləcə də bufet, akt zalı, idman zalı mövcuddur. Bu məktəb binasında da videomüşahidə, yanğın əleyhinə siqnalizasiya sistemləri quraşdırılıb, internet və telefon xətləri çəkilib, qazanxana tikilib.
Akt zalında müəllimlər, valideynlər və yerli sakinlərlə görüşən təhsil naziri Mikayıl Cabbarov bayram günlərində ikiqat sevinc hissi yaşayan kənd sakinlərini təbrik edib.
Məktəbin müəllim kollektivi və kənd sakinləri yeni məktəb binasının tikintisini kəndin ictimai həyatında əlamətdar tarixi hadisə adlandıraraq dövlətimizin təhsilə qayğısını yüksək qiymətləndiriblər.
2014-2015-ci tədris ilinin əvvəlində Qusar rayonunun Atlıxan, Kufoba, Əniğoba, Hiloba, Aşağı İmamqulukənd və Çubuqlu kəndlərində tiklən yeni məktəb binaları şagirdlərin istifadəsinə verilib.
Bölmənin digər xəbərləri
