İDMAN
Rumıniya cüdoçusu birinci Avropa Oyunlarında qızıl medal qazanıb [YENİLƏNİB] VİDEO
Qadınların yarışında 52 kiloqram çəki dərəcəsində həlledici görüşdə Avropa çempionatının gümüş mükafatçısı, rumıniyalı Andrea Çitu və ötən il Bakıda təşkil olunan “Böyük dəbilqə” turnirinin qalibi fransalı Annabella Eurine üz-üzə gəliblər. Rumıniya təmsilçisi qalib gələrək birinci Avropa Oyunlarının çempionu adını qazanıb.
Almaniyalı Marin Kreh və Mərakeşdə təşkil olunan “World Masters” turnirini birinci pillədə başa vuran rusiyalı Nataliya Kuziutina “Bakı-2015”-in bürünc medallarına sahib olublar.
20:55
Birinci Avropa Oyunlarında 60 kiloqram çəki dərəcəsində mübarizə aparan cüdoçumuz Orxan Səfərov qızıl medal uğrunda görüşdə rusiyalı Beslan Mudranova məğlub olaraq gümüş medalla kifayətlənib.
İsveçrə təmsilçisi, Avropa çempionatının bürünc mükafatçısı Ludvik Çammarti və dünya çempionatının bürünc medalçısı, gürcüstanlı Amiran Papinaşvili bürünc medallara sahib olublar.
Xatırladaq ki, Orxan Səfərov ilk görüşündə Belarusu təmsil edən həmyerlimiz Arif Bağırovdan üstün olub. İsveçrə təmsilçisi Ludovik Çammarti və ispaniyalı Fransisko Qarriqosu məğlub edən cüdoçumuz finala vəsiqə qazanıb.
20:28
Qadınların yarışında 48 kiloqram çəki dərəcəsində finalda belçikalı Çarlin Van Snik və türkiyəli Ebru Şahin üz-üzə gəliblər. Gərgin idman mübarizəsi şəraitində keçən görüşdə Düsseldorf Qran-pri yarışlarının qalibi Çarlin Van Sink birinci Avropa Oyunlarında cüdo yarışlarının ilk qızıl medalını qazanıb.
Ötən il Avropa çempionu Yeva Çernoviçki (Macarıstan) və “Samsun-2014” Qran-pri yarışlarının qalibi, rusiyalı İrina Dolqova yarışı bürünc medallarla başa vurublar.
17:47
Cüdoçumuz Orxan Səfərovun (60 kq) finaldakı rəqibi müəyyənləşib. Yarımfinal qarşılaşmasında niderlandlı Joren Mureni məğlub edən Rusiya cüdoçusu Beslan Mudranov finalda Orxan Səfərova rəqib olub.
Nicat Şıxəlizadə isə bürünc medal uğrunda görüşdə rusiyalı Mixail Pulyayev ilə üz-üzə gələcək.
17:27
Cüdoçumuz Nicat Şıxəlizadə təsəlliverici görüşdə Ukrayna idmançısı Georgi Zantarayaya ipponla qalib gələrək bürünc medal uğrunda mübarizə hüququ qazanıb.
17:09
Cüdoçumuz Orxan Səfərov (60 kq) yarımfinalda ispaniyalı Fransisko Qarriqosu məğlub edərək finala adlayıb. Qızıl medal uğrunda görüşdə Orxan Səfərov Joren Muren (Niderland) - Beslan Mudranov (Rusiya) görüşünün qalibi ilə qarşılaşacaq.
16:49
Cüdoçumuz Nicat Şıxəlizadə təsəlliverici görüşdə iştirak hüququ qazanıb. Milli komandamızın üzvü Ukrayna idmançısı Georgi Zantarayaya qalib gələcəyi təqdirdə bürünc medal uğrunda mübarizə aparacaq.
16:30
Türkiyəli Sinan Sandal və italiyalı Elio Verdeni ipponla məğlub edən cüdoçumuz Nicat Şıxəlizadə (66 kq) dörddəbir finalda Pirtuqaliya təmsilçisi Sergey Oleynikə məğlub olub.
16:15
Cüdoçumuz Orxan Səfərov (60 kq) ikinci qələbəsini qazanıb. İsveçrə təmsilçisi Ludovik Çammartini məğlub edən cüdoçumuz yarımfinalda ispaniyalı Fransisko Qarriqos ilə qarşılaşacaq.
Fransisko Qarriqos digər cüdoçumuz İlqar Müşkiyevi yarışdan kənarlaşdırmışdı.
15:25
Cüdoçumuz Nicat Şıxəlizadə (66 kq) yarışda ikinci qələbəsini qazanıb. Türkiyəli Sinan Sandalı ipponla yarışdan kənarlaşdıran cüdoçumuz səkkizdəbir finalda da eyni uğuru təkrarlayaraq italiyalı Elio Verdedən üstün olub. “Böyük dəbilqə” və Qran-pri yarışlarının qalibi dörddəbir finalda portuqaliyalı Sergey Oleyniklə qarşılaşacaq.
14:36
Cüdoçumuz Orxan Səfərov (60 kq) ilk görüşdə Belarusu təmsil edən həmyerlimiz Arif Bağırov ilə üz-üzə gəlib. Rəqibini məğlub edən Orxan Səfərov dörddəbir finala vəsiqə qazanıb. Onun rəqibi Ludviq Paişer (Avstriya) - Ludovik Çammartin (İsveçrə) qarşılaşmasının qalibi olacaq.
13:59
Cüdoçumuz İlqar Müşkiyev ilk görüşündə Fransisko Qarriqos (İspaniya) ilə üz-üzə gəlib. Gərgin idman mübarizəsi şəraitində keçən görüşdə İlqar Müşkiyev rəqibinə məğlub olaraq “Bakı-2015”-də mübarizəni dayandırıb.
13:36
Qadınların yarışında 48 kiloqram çəki dərəcəsində mübarizə aparan Leyla Əliyeva (48 kq) ilk görüşdə Slovakiya idmançısı Kristina Vrsiçə qalib gələrək səkkidzəbir finala adlasa da, “London-2012”-nin mükafatçısı, belçikalı Çarlin Van Snikə məğlub olaraq yarışda iştirakını yekunlaşdırıb.
Daha bir cüdoçumuz da “Bakı-2015”-də iştirakını başa vurub. Avropa çempionatının və dünya kuboku yarışlarının gümüş mükafatçısı Tərlan Kərimov (66 kq) ilk görüşdə Rusiya təmsilçisi Mixail Pulyayevə uduzub.
13:16
Cüdoçumuz Nicat Şıxəlizadə (66 kq) yarışda ilk qələbəsini qazanıb. Türkiyəli Sinan Sandalı ipponla məğlub edən idmançımız səkkizdəbir finalda Artyom Nacu (Moldova) - Elio Verde (İtaliya) qarşılaşmasının qalibi ilə üz-üzə gələcək.
12:51
Cüdoçumuz Orxan Səfərov (60 kq) ilk görüşündə Belarusu təmsil edən həmyerlimiz Arif Bağırov ilə üz-üzə gələcək. Arif Bağırov ilk mərhələdə monakolu Yan Sikkardidən üstün olub.
Qadın cüdoçumuz Səkinə Zairova (52 kq) isə İsrail idmançısı Roni Şvarça məğlub olub.
12:34
Yarışda 60 kiloqram çəki dərəcəsində mübarizə aparacaq cüdoçumuz İlqar Müşkiyevin ilk rəqibi müəyyənləşib. İspaniyalı Fransisko Qarriqos İsrail təmsilçisi Alon Raxima qalib gələrək səkkizdəbir finalda İlqar Müşkiyevin rəqibi olub.
12:28
Daha bir çüdoçumuz birinci Avropa Oyunlarına qələbə ilə başlayıb. Aişə Qurbanlı (48 kq) rusiyalı Kristina Rumyançevanı məğlub edərək səkkizdəbir finala adlayıb. Cüdoçumuzun növbəti rəqibi italiyalı Valentina Moskatdır.
12:12
Qadınların yarışında 48 kiloqram çəki dərəcəsində mübarizə aparan Leyla Əliyeva (48 kq) ilk görüşündə Slovakiya idmançısı Kristina Vrsiçə qalib gəlib. Yeniyetmələrin Yay Olimpiya Oyunlarının, Avropa və dünya çempionatının gümüş mükafatçısı Leyla Əliyeva səkkizdəbir finalda belçikalı Van Snik ilə qarşılaşacaq.
12:00
Bakı, 25 iyun, Səxavət Quliyev, AZƏRTAC
İyunun 25-də birinci Avropa Oyunlarında cüdo yarışlarına start verilib.
AZƏRTAC xəbər verir ki, cüdo yarışlarının ilk günündə kişilər arasında 60, 66, qadınların mübarizəsində isə 48, 52 və 57 kiloqram çəki dərəcələrində idmançılar Heydər Əliyev adına İdman Sarayında tatami üzərinə çıxırlar.
Yarışda 60 kiloqram çəki dərəcəsində mübarizə aparacaq cüdoçularımız Orxan Səfərov Yan Sikkardi (Monako) – Arif Bağırov (Belarus), İlqar Müşkiyev isə Fransisko Qarriqos (İspaniya) – Alon Raxima (İsrail) qarşılaşmalarının qalibləri ilə üz-üzə gələcək. Digər cüdoçularımız Nicat Şıxəlizadə (66 kq) türkiyəli Sinan Sandal, Tərlan Kərimov (66 kq) Rusiya təmsilçisi Mixail Pulyayev ilə mübarizə aparacaqlar.
Qadınların mübarizəsində Leyla Əliyeva (48 kq) Slovakiya idmançısı Kristina Vrsiç, Aişə Qurbanlı (48 kq) rusiyalı Kristina Rumyançeva, Səkinə Zairova (52 kq) İsrail cüdoçusu Roni Şvarç, Kifayət Qasımova (57 kq) isə serbiyalı Yovana Roqiç ilə qarşılaşacaqlar.