Qəbələdə aqrar sənaye kompleksinin inkişafı istiqamətində görülən işlər digər rayonlar üçün də nümunədir VİDEO
Rayonların aqrar sahədə potensialı və imkanları öyrənilir, mövcud problemlərin həllinə dair fermerlər və torpaq mülkiyyətçiləri ilə fikir mübadiləsi aparılır
Qəbələ, 26 may, Şahnəzər Bəşirov, AZƏRTAC
Qəbələdə aqrar sənaye kompleksinin inkişafı istiqamətində görülən işlər digər rayonlar üçün də nümunədir. Hazırda rayonda kənd təsərrüfatı sənayeləşir, böyük emal müəssisələri fəaliyyət göstərir, ixrac potensialının artırılması üçün işlər görülür və uğurlu nəticələr əldə edilir. Kənd təsərrüfatında gəlirli sahələr inkişaf etdirilir, yeni iş yerləri açılır, əhalinin məşğulluğu təmin olunur.
AZƏRTAC xəbər verir ki, bu fikirlər Qəbələdə fermerlərin, aqrar sahədə çalışan sahibkarların, mütəxəssislərin və müvafiq dövlət strukturları nümayəndələrinin iştirakı ilə keçirilən müşavirədə səsləndirilib.
Azərbaycan Prezidenti İlham Əliyevin tövsiyə və tapşırıqlarına müvafiq olaraq, rayonlarda kənd təsərrüfatı işlərinin gedişinin, fermerlərin, torpaq mülkiyyətçilərinin təklif və istəklərinin, həmçinin aqrar sektorun inkişaf perspektivlərinin öyrənilməsi və operativ tədbirlərin görülməsi məqsədilə yaradılan işçi qrupun üzvləri mayın 26-da Qəbələ rayonunda olublar.
İşçi qrupun rəhbəri, Azərbaycan Respublikası Prezidenti Administrasiyasının aqrar siyasət məsələləri şöbəsinin müdiri Azər Əmiraslanov, qrupun üzvləri və rayon rəhbərliyi əvvəlcə Qəbələ konserv zavodu, Qəbələ şərab emalı zavodu və üzüm plantasiyasına, Qəbələ Qida Şəhərciyində yarımfabrikat dondurulmuş kartof və kartof-cipsi istehsalına, baramaçılıq və tütünçülüklə məşğul olan kəndli fermer təsərrüfatlarına, taxıl və kartof əkini sahələrinə baxış keçirib, fermerlərlə görüşərək təsərrüfat işlərinin gedişi ilə maraqlanıblar.
Sonra Qəbələ Rayon İcra Hakimiyyətində fermerlərin, aqrar sahədə çalışan sahibkarların, mütəxəssislərin, müvafiq idarə və təşkilat rəhbərlərinin, təsərrüfat sahiblərinin, bələdiyyə sədrlərinin iştirakı ilə müşavirə keçirilib.
Müşavirədə çıxış edən Qəbələ Rayon İcra Hakimiyyətinin başçısı Səbuhi Abdullayev rayonda iqtisadiyyatın aparıcı sahəsi olan kənd təsərrüfatı işlərinin gedişi və bu sahədə mövcud vəziyyətlə bağlı məlumat verib, aqrar sektorun perspektivlərindən danışıb.
Prezident Administrasiyasının aqrar siyasət məsələləri şöbəsinin müdiri Azər Əmiraslanov çıxış edərək, dövlətimizin başçısının rəhbərliyi ilə respublikamızda aparılan islahatlardan, qeyri-neft sektorunun, o cümlədən kənd təsərrüfatının inkişafı istiqamətində görülən tədbirlərdən danışıb, aqrar sektorun perspektivləri barədə geniş məlumat verib. Şöbə müdiri Prezident İlham Əliyevin rayonlarda yerli istehsalın artırılması, əhalinin məşğulluğunun yüksəldilməsi ilə bağlı tapşırıqlarını diqqətə çatdıraraq, Qəbələdə ixrac tutumlu sahələrin, o cümlədən üzümçülük, kartofçuluq, baramaçılıq və heyvandarlığın inkişafının vacibliyini vurğulayıb. Qeyd edib ki, rayonda kənd təsərrüfatının uzunmüddətli inkişafı üçün istehsal və emalla yanaşı, logistika bazasının olması da vacibdir.
Müşavirədə Prezidentin tövsiyə və tapşırıqlarının icrası ilə bağlı rayonda görülən işlər barədə məlumat verilib. Qeyd olunub ki, gəlirli və ixracyönümlü sahələr olan tütünçülük və baramaçılıq dirçəldilir. Vaxtilə rayon hər iki sahədə yüksək göstəriciləri ilə fərqlənirdi. 1986-cı ildə rayonda 7923 ton tütün, 1990-cı illərin əvvəllərində isə 169 ton barama istehsal olunmuşdu. Tütün istehsalına görə Qəbələ Zaqatala, Şəki və Balakəndən sonra dördüncü yeri tuturdu. Amma sonradan bu sahə arxa plana keçməyə başladı. Sonuncu dəfə Qəbələdə 2006-cı ildə cəmi 22 hektar sahədə tütün əkilmiş və 56 ton məhsul istehsal edilmişdi. Sonrakı illərdə isə ümumiyyətlə, tütün əkilməyib. Nəhayət, bu il 50 hektar sahədə tütün əkini aparılıb. Baramaçılıq da eyni aqibətlə üzləşib. Bu gün isə tütünçülük və baramaçılıqla məşğul olan ailə təsərrüfatları fəaliyyətlərini yenidən bərpa edirlər. Rayon əhalisinin təcrübəsini nəzərə alaraq əminliklə demək olar ki, tütünçülük və baramaçılıq yenidən aparıcı təsərrüfat sahələrinə çevriləcək, insanlar bunun faydasını görəcəklər.
Prezident Administrasiyasının rəsmisi bildirib ki, işçi qrupu tərəfindən rayonlarda keçirilən görüşlərdə əsas məqsəd aqrar sahədə potensialı və imkanları öyrənmək, eyni zamanda, mövcud problemlərlə bağlı fermerlər və torpaq mülkiyyətçiləri ilə fikir mübadiləsi aparmaqdır.
Azər Əmiraslanov kənd təsərrüfatı işlərində dövlətin, fermerlərin və emal müəssisələrinin birgə əməkdaşlığının zəruri olduğunu söyləyib, müşavirə iştirakçılarını açıq müzakirələrə dəvət edib. Diskussiya şəraitində davam edən müşavirənin sonunda fermer və sahibkarları maraqlandıran məsələlərə aydınlıq gətirilib, onların təklifləri dinlənilib. Kənd təsərrüfatı məhsulları istehsalçılarına aşağı faizlə kreditlərin verilməsi, rayonda istehsal olunan kənd təsərrüfatı məhsullarının tədarükü və saxlanması üçün müasir anbar binalarının tikilməsi, bəzi kəndlərdə suvarma suyu probleminin aradan qaldırılması və digər məsələlərlə bağlı təkliflər səsləndirilib.
Müşavirədə kənd təsərrüfatı nazirinin müavini Seyfəddin Talıbov, iqtisadiyyat nazirinin müavini Sahib Məmmədov, “Meliorasiya və Su Təsərrüfatı” ASC-nin sədr müavini Zakir Quliyev də iştirak edib, fermer və sahibkarların suallarını cavablandırıblar.
Bölmənin digər xəbərləri
