Bakı, 3 iyun, AZƏRTAC

İyunun 3-də Dünya Azərbaycanlılarının IV Qurultayı çərçivəsində “Müasir dövrdə informasiya müharibəsi - müdafiədən hücuma: şərtlər, siyasi reallıqlar və yeni fəaliyyət mexanizmləri” mövzusunda panel sessiyası keçirilib.

AZƏRTAC xəbər verir ki, iclasa Milli Məclisin deputatı, Azərbaycan Respublikasının Prezidenti yanında Dövlət İdarəçilik Akademiyasının Siyasi Araşdırmalar İnstitutunun direktoru, professor Elman Nəsirov moderatorluq edib. O, Dünya Azərbaycanlılarının IV Qurultayının açılış mərasimində Azərbaycan Respublikasının Prezidenti İlham Əliyevin söylədiyi nitqin əhəmiyyətini vurğulayıb, bu baxımdan panelin mövzusunun aktuallığını qeyd edib.

AMEA-nın akademik katibi, İnformasiya Texnologiyaları İnstitutunun direktoru, akademik Rasim Əliquliyev məruzə ilə çıxış edərək 2016-cı ildə Azərbaycanın dövlət müstəqilliyini bərpa edilməsinin 25 ilinin tamam olduğunu xatırladıb. Qeyd edib ki, bu müddətdə Azərbaycan tarixi nailiyyətlər əldə edib və dünyanın ən yüksək texnologiyalarına əsaslanan, özünün kosmik peyki olan bir ölkəyə çevrilib. Lakin dünyada qlobal səviyyədə informasiya müharibəsinin aparıldığı yaddan çıxmamalıdır. Doğrudur, Azərbaycanda hökumət səviyyəsində informasiya sahəsində mühüm işlər görülür. Lakin virtual məkanda dünya azərbaycanlılarının həmrəyliyini qorumaq, vahid məkandan fəaliyyəti əlaqələndirmək lazımdır. Məsələn, dünyada ən inkişaf etmiş saytlardan biri olan “Vikipedia”da fəallıq artırılmalıdır. Böyük potensialımız səfərbər edilməlidir. Habelə müxtəlif qrafikalı, o cümlədən kiril, ərəb qrafikalarında yazılar arasında çəpər götürülməli, transliterasiya problemi həll edilməlidir. Bir sözlə, müasir dövrdə informasiya müharibəsində təkcə Azərbaycanın resursları yetərli deyil, dünya azərbaycanlıları bu işə öz töhfəsini verməlidirlər.

Ermənistan-Azərbaycan, Dağlıq Qarabağ münaqişəsi üzrə tədqiqatçı, “Türküstan və Cənubi Qafqaz: daşnaklar Fərqanədən Qarabağadək” kitabının müəllifi Şuxrat Salamov (Özbəkistan) çıxış edərək Azərbaycan və özbək xalqlarının ortaq tarixi və mədəniyyətindən söhbət açıb. O bildirib ki, Özbəkistan Azərbaycanın ərazi bütövlüyünü dəstəkləyir, problemin sülh yolu ilə həllinin tərəfdarıdır. Ş.Salamov “Daşnaksütyun” partiyasının özbək və Azərbaycan xalqlarına qarşı törətdiyi təxribatlara dair faktlar gətirib, tarixi hadisələr barədə materialların nəşr etdirilərək gənc nəslə çatdırılmasının əhəmiyyətini vurğulayıb.

Ukrayna Azərbaycanlıları Birləşmiş Diasporunun (UABD) sədri, Türkdilli Diasporların Ukrayna Regional Mərkəzinin icra katibi, hüquq elmləri üzrə fəlsəfə doktoru Hikmət Cavadov məruzəsində informasiya məkanında xarici KİV-lərdə çıxış etməyin əhəmiyyətini vurğulayıb. Diqqətə çatdırıb ki, xarici KİV-lərin böyük əksəriyyətinin biznes strukturu olması nəzərə alınmalıdır. Bu baxımdan müvafiq istiqamətdə fondun təşkili, eləcə də KİV-lərlə bağlı koordinasiya mərkəzinin yaradılması və bu işə peşəkar jurnalistlərin cəlb edilməsi faydalı olar.

Litva Azərbaycanlıları Cəmiyyətinin sədri, Azərbaycan Respublikasının Əməkdar Jurnalisti Mahir Həmzəyev rəhbərlik etdiyi qurumun fəaliyyətindən söhbət açıb, Azərbaycan həqiqətlərinin dünyaya çatdırılmasında Litva, latış, eston xalqlarının təcrübəsindən bəhrələnməyi təklif edib. Qeyd edib ki, 2006-cı ildə Litvada Qarabağ hadisələrini işıqlandıran litvalı jurnalistlər qrupu yaradılıb. Qrup informasiyanın təqdimatında müxtəlif janrlardan istifadə edir, Avropa düşüncə tərzinə uyğun materiallar hazırlayır. Lakin ümumilikdə hələ görüləsi işlər çoxdur, xüsusilə sosial şəbəkələrdə fəallıq artırılmalıdır.

Ümumrusiya Azərbaycan Konqresinin icraçı direktorunun birinci müavini Samir Məmmədov məruzəsində informasiya platforması yaratmağın zəruriliyini vurğulayıb. Diqqətə çatdırıb ki, Rusiyada yaşayan ermənilər vətənpərvərlik pərdəsi altında rus xalqı adından Rusiya siyasətinə dair fikirlər söyləyir, tövsiyələrini verir, əslində isə bu regionda öz mənafelərini güdürlər. Ermənilər hansı dövlətdə yaşamalarına baxmayaraq orada informasiya agentliyi yaradır, həmin ölkənin marağını müdafiə etmək adı ilə öz niyyətlərini həyata keçirirlər. S.Məmmədov həm Azərbaycana, həm də Rusiyaya loyal informasiya agentliyini yaratmaq və bunun vasitəsilə Azərbaycan həqiqətlərini yaymaq, eləcə də digər ölkələrdə bu cür platformanı həyata keçirmək təklifini irəli sürüb. O, tədbir iştirakçılarına Dünya Azərbaycanlılarının V Qurultayının Şuşada keçirilməsini arzu edib.

Dünya Azərbaycanlılarını Əlaqələndirmə Şurasının üzvü, Avropa Azərbaycanlıları Konqresinin fəxri prezidenti, Mayns Azərbaycan Cəmiyyətinin sədri Başar Kömür (Almaniya) beynəlxalq təşkilatların nizamnamə və digər sənədlərində xalqların hüququna dair müddəaların real hadisələrə tətbiqində ikili standartların olduğundan söz açıb. O, Avropanın paytaxt şəhərlərindən birində mərkəzin yaradılması təklifini, azərbaycanlılara qarşı iftiralarla bağlı məhkəməyə müraciət edilməsi təklifini irəli sürüb.

İsrail Dövlətində “Justice for Khojaly” beynəlxalq kampaniyasının rəsmi əlaqələndiricisi, “Cəmiyyət üçün beynəlxalq layihələr” qeyri-hökumət təşkilatının rəhbəri, beynəlxalq əlaqələr üzrə ekspert, Hayfa Universitetinin doktorantı Arye Qut məruzəsində bildirib ki, İsrail Azərbaycanın ərazi bütövlüyünü dəstəkləyir. Son iki ildə Azərbaycana jurnalistlərdən ibarət nümayəndə heyətləri gəlir. Azərbaycanın geosiyasi gücünün artmasını, iqtisadi yüksəlişini vurğulayan A.Qut iki ölkə arasında müxtəlif sahələrdə əməkdaşlıq əlaqələrini qeyd edib və bu əlaqələrin davam etməsinin əhəmiyyətini vurğulayıb. Diqqətə çatdırıb ki, heç bir dövlətdə yəhudilərə qarşı Azərbaycanda olduğu qədər bu cür yüksək münasibət yoxdur. Bu, Azərbaycan dövlətinin multikultural dəyərlərə sahib olması ilə bağlıdır. A.Qut Azərbaycanın haqq səsinin dünyaya çatdırılması işinə intellektual elitanı daha çox cəlb etmək təklifini irəli sürüb. Onun sözlərinə görə, Azərbaycanın başqa ölkələrdə intellektual elita ilə tanınması xeyli fayda gətirə bilər. A.Qut ayrı-ayrı ölkələrdə yerli ictimai, siyasi xadimlər arasında Azərbaycanı dəstəkləyən insanların olmasının zəruriliyini bildirib.

Azərbaycan Hyuston Mərkəzi, Hyuston Bakı Qardaşlaşmış Şəhərlər Assosiasiyasının prezidenti İradə Axundova məruzəsində xaricdə yaşayan azərbaycanlıların üzərinə ölkəni təmsil etmək baxımından böyük məsuliyyət düşdüyünü söyləyib. Diqqətə çatdırıb ki, Azərbaycan Hyuston Mərkəzi təkcə Hyuston şəhərində deyil, ABŞ-ın ətraf ştatlarında da görüşlər keçirir, mədəniyyət, təhsil, tibb və biznes istiqamətlərində layihələr reallaşdırır, Azərbaycanın Respublika Günü, Dövlət Bayrağı Günü, Novruz bayramı qeyd olunur. Xocalı həqiqətlərinin amerikalı tələbələrə çatdırılması məqsədilə “Xocalıya ədalət!” beynəlxalq kampaniyası çərçivəsində universitetlərdə tədbirlər keçirilir. Aprel ayında Ermənistan silahlı qüvvələrinin qoşunların təmas xətti boyunca təxribat törətmələri zamanı təşkilat ABŞ-da Azərbaycan Ordusuna dəstək yürüşləri təşkil edib.

Avropa Azərbaycanlıları Konqresi İcraiyyə Komitəsinin üzvü, “Vətən” cəmiyyətinin sədri Səfər Sadiqi (Danimarka) türk diasporu ilə birgə fəaliyyət göstərməyin əhəmiyyətindən danışıb. O, türk diaspor təşkilatlarının gücündən istifadə etməyin vacibliyini vurğulayıb.

Panel sessiyada Ermənistan dövləti, erməni diasporu və lobbisinin Azərbaycana qarşı yönəlmiş informasiya müharibəsində Azərbaycan diasporunun üzərinə düşən vəzifələr, qondarma “erməni soyqırımı” iddiaları ilə əlaqədar Azərbaycan və türk diasporunun birgə fəaliyyətinin yeni dövrün tələblərinə uyğun mexanizmlərinin necə qurulması, ölkəmizin Ermənistan tərəfindən işğal olunmuş Dağlıq Qarabağ bölgəsində qurulmuş separatçı rejimin müstəqil dövlət kimi tanıdılması istiqamətində kampaniyaların qarşısının alınması üçün hansı addımların atılması məsələləri üzrə çıxışlar dinlənilib. Habelə Azərbaycana qarşı bəzi ölkələrdə aparılan təbliğata necə cavab verilməli, media və sosial şəbəkələrin informasiya müharibəsində rolu, Azərbaycan həqiqətlərinin dünyaya çatdırılmasında informasiya texnologiyalarının effektiv tətbiqi üçün vahid strategiyanın müəyyən olunması məsələləri müzakirə edilib.

Daha sonra məruzələr ətrafında fikir mübadiləsi aparılıb və təkliflər irəli sürülüb.