İDMAN
BMX üzrə növbəti dünya çempionatı Belçikada keçiriləcək
Bakı, 6 iyun, AZƏRTAC
2019-cu ildə velosiped idmanının BMX növü üzrə növbəti dünya çempionatı Belçikada təşkil olunacaq.
AZƏRTAC xəbər verir ki, mundialın Dessele şəhərində keçirilməsi barədə qərar 2017-ci ilin avqustunda Avropa Velosipedçilər İttifaqının Danimarkada baş tutan Rəhbərlər Şurasının iclasında qəbul olunub.
Belçika velosiped idmanı üzrə güclü ənənəyə malikdir. Bu ölkə nüfuzlu birgünlük “Tur Flandrii” və Lej-Baston-Lej veloyürüşlərinə ev sahibliyi edib. Həmçinin Beynəlxalq Velosipedçilər İttifaqının (UCİ) yüksək kateqoriyalı çoxgünlük “Tour de Belguim”, qurumun 1 və 2 kateqoriyalı Kürne-Brüssel-Kürne, elit klassik kateqoriyasında 3, yüksək kateqoriyalı birgünlük 4 veloyarış təşkil olunub.
Bakıda keçirilən dünya çempionatı çərçivəsində iyunun 9-da mundialın bayrağı Belçikaya təqdim olunacaq.
Bakının ev sahibliyi etdiyi dünya çempionatına 43 ölkədən 1500-dək velosipedçi qatılıb.