Bir portretin tarixçəsi
Bakı, 21 fevral, AZƏRTAC
Fevralın 27-də Azərbaycan Milli Elmlər Akademiyasının Milli Azərbaycan Tarixi Muzeyində görkəmli rus rəssamı İsaak Brodskinin anadan olmasının 135-ci ildönümünə həsr edilən “Bir portretin tarixçəsindən” mövzusunda elmi seminar keçiriləcək.
Muzeydən AZƏRTAC-a bildiriblər ki, tədbir Bakı şəhərindəki Rusiya İnformasiya və Mədəniyyət Mərkəzinin birgə təşkilatçılığı ilə reallaşacaq.
Seminarda muzeyin elmi katibi, dosent Fərhad Cabbarov məşhur xeyriyyəçi Hacı Zeynalabdin Tağıyev ilə görkəmli rəssam İsaak Brodskinin görüşü, portretin yaranma tarixçəsi barədə çıxış edəcək. Muzeyin bərpaçı-rəssamı Gülşən Hacıyeva portretin bərpası haqqında məlumat verəcək.
Qeyd edək ki, XX əsrin əvvəllərində rəssam İ.Brodskinin yaradıcılığı Azərbaycanla bağlı olub. Hacı Zeynalabdin Tağıyevin portretini çəkmək kimi məsuliyyətli işin öhdəsindən gələn İ.Brodski əsəri 1912-ci ildə təhvil verib. Hazırda həmin portret Milli Azərbaycan Tarixi Muzeyində yerləşən H.Z.Tağıyevin xatirə muzeyində nümayış olunur.
Bölmənin digər xəbərləri
