Ümummilli Liderin siyasi iradəsi və şəxsi nümunəsi xalqı bir araya gətirdi ŞƏRH
Bakı, 10 may, AZƏRTAC
Mayın 10-u Azərbaycan tarixində, sadəcə, bir təqvim günü deyil, milli yaddaşın, dövlətçilik düşüncəsinin və müasir inkişaf modelinin formalaşmasında əvəzsiz xidmətləri olan Ulu Öndərin həyat və fəaliyyətinə yenidən nəzər salmaq üçün mühüm bir fürsətdir. Bu əlamətdar gün münasibətilə xalqımız dərin ehtiram və minnətdarlıq hissi ilə onun əziz xatirəsini yad edir, zəngin irsini xatırlayır və gələcək nəsillər üçün qoyduğu ideyaların əhəmiyyəti üzərində düşünür. Ulu Öndər Heydər Əliyev hər şeydən əvvəl öz xalqına sonsuz məhəbbət bəsləyən, Vətəninə sadiq vətənpərvər Lider idi. Onun “Anam məni Azərbaycan üçün dünyaya gətirib” fikri bu sevginin ən səmimi ifadələrindən biri kimi yadda qalıb. Bu vətənpərvərlik təkcə emosional bağlılıqdan ibarət deyildi. Əksinə, bu, dərin düşüncəyə, milli maraqlara və dövlətçilik prinsiplərinə əsaslanan çoxşaxəli bir ideologiya idi.
Bu sözləri AZƏRTAC-a açıqlamasında Milli Məclisin deputatı Şahin Seyidzadə deyib.
O bildirib ki, xüsusilə müstəqilliyin ilk illərində ölkənin üzləşdiyi çətinliklər fonunda bu vətənpərvərlik həm müdafiə xarakteri daşıyır, həm də xalqı bir amal ətrafında birləşdirirdi. Ulu Öndər Heydər Əliyevin vətənpərvərlik anlayışı yalnız hərbi və siyasi müstəvi ilə məhdudlaşmırdı. O, eyni zamanda, maarifçi və intellektual mahiyyət daşıyırdı. Ulu Öndər Heydər Əliyev yaxşı anlayırdı ki, müasir dünyada güclü dövlət quruculuğu yalnız elmə, təhsilə və mədəniyyətə əsaslanmalıdır. Bu səbəbdən də o, gənclərin inkişafına xüsusi diqqət yetirir, onların ən nüfuzlu ali məktəblərdə təhsil almasına şərait yaradırdı. Hələ sovet dövründə azərbaycanlı gənclərin hərbi və digər sahələrdə geri qalmasının qarşısını almaq üçün atdığı addımlar onun uzaqgörən siyasətinin bariz nümunəsidir.
Milli Məclisin deputatı qeyd edib ki, müstəqilliyin ilk illərində Azərbaycan ağır sınaqlarla üz-üzə qalmışdı. Dövlətçiliyin qorunması, ərazi bütövlüyünün təmin edilməsi və cəmiyyətin parçalanmasının qarşısının alınması əsas prioritetlər idi. Belə bir mürəkkəb dövrdə Ulu Öndər Heydər Əliyevin siyasi iradəsi və şəxsi nümunəsi xalqı bir araya gətirdi. O, vətəndaşları fərqli baxışlardan asılı olmayaraq vahid məqsəd - dövlətin qorunması və inkişafı naminə birləşdirməyi bacardı.
Ş.Seyidzadə diqqətə çatdırıb ki, Ümummilli Lider Heydər Əliyevin irsində xüsusi yer tutan məsələlərdən biri də milli ideologiyanın formalaşdırılması idi. Vətənpərvərlik yalnız hisslər üzərində qurulduqda bəzən təhlükəli istiqamətlərə yönələ bilər. Lakin bilik, mədəniyyət və əxlaqla zənginləşdirilən vətənpərvərlik cəmiyyətin inkişafına xidmət edir. Məhz bu yanaşma nəticəsində Azərbaycanda dövlətçilik düşüncəsi daha sistemli və davamlı xarakter aldı. Elm və təhsilə verilən önəm də Ulu Öndər Heydər Əliyevin fəaliyyətində mühüm yer tuturdu. 1993-cü ildə hakimiyyətə qayıtdıqdan sonra onun ilk ünvanlarından birinin Azərbaycan Elmlər Akademiyası olması təsadüfi deyildi. Bu addım elmin dövlət siyasətində prioritet istiqamətlərdən biri olduğunu açıq şəkildə göstərirdi. O, alimlərlə daim ünsiyyətdə olur, onların fəaliyyətini dəstəkləyir və elmi inkişafı ölkənin gələcəyi üçün əsas amillərdən biri hesab edirdi. Müasir dövrdə vətənpərvərlik anlayışı daha geniş məzmun kəsb edir. Qloballaşma və inteqrasiya şəraitində bu anlayış yalnız milli sərhədlərlə məhdudlaşmır, eyni zamanda, beynəlxalq əməkdaşlıq, tolerantlıq və qarşılıqlı hörmət kimi dəyərlərlə zənginləşir. Bu baxımdan, Ulu Öndər Heydər Əliyevin irəli sürdüyü ideyalar bu gün də aktuallığını qoruyur və müasir Azərbaycanın inkişafında mühüm rol oynayır.
“Bu siyasi kurs bu gün Prezident İlham Əliyev tərəfindən uğurla davam etdirilir. Onun rəhbərliyi ilə ölkəmizdə genişmiqyaslı islahatlar həyata keçirilir, iqtisadiyyat modernləşdirilir, sosial rifah yüksəlir və Azərbaycanın beynəlxalq mövqeyi daha da möhkəmlənir. Prezident İlham Əliyevin fəaliyyəti sübut edir ki, Ulu Öndər Heydər Əliyevin müəyyən etdiyi strateji xətt zamanın tələblərinə uyğun şəkildə inkişaf etdirilir. Ulu Öndər Heydər Əliyevin zəngin irsi bu gün də yolumuzu işıqlandırır, gələcək inkişafımız üçün möhkəm təməl rolunu oynayır. Bu irsə sahib çıxmaq, onu qorumaq və gələcək nəsillərə ötürmək isə hər bir Azərbaycan vətəndaşının müqəddəs borcudur”, - deyə deputat vurğulayıb.
Bölmənin digər xəbərləri
