MƏDƏNİYYƏT


Çox insanın xəbərsiz olduğu Nobel Qardaşları Muzeyi VİDEO

Bakı, 12 fevral, Xəyalə Cəfərova, AZƏRTAC

Nobel qardaşları haqqında ilk məlumata orta məktəbdə tarix dərsliyində rast gəlmişik. Şimali Avropadan Nobel qardaşlarının Bakıya gəlişi, neft sənayesinə sərmayə qoyması çox maraqlı idi. Nobel qardaşları ölkəmizin iqtisadi həyatında dərin iz qoyub.

Onların Bakıdakı fəaliyyətinin nişanələrindən biri – Nobel Qardaşlarının Ev-Muzeyi kimi tanınan məkandır.

Alfred Nobel, 57/2 ünvanında yerləşən bu muzeydə Nobel qardaşları və ailəsi haqqında dolğun məlumatlar əldə etmək mümkündür.

Bu məqsədlə AZƏRTAC-ın müxbiri Nobel Qardaşlarının Ev-Muzeyində olub.

İlk dəfə 1871-ci ildə Robert Nobelin Bakıya gəlməyi haqqında məlumat verən muzeyin direktoru Fuad Qasımov deyib ki, Robertin paytaxtımıza gəlməkdə məqsədi istehsal etdikləri silahların qundağı üçün möhkəm ağac axtarması olsa da, Suraxanı ərazisində gördüyü neft gölməçələri onun fikrini bu sahəyə yönəldir. Daha sonra qardaşı Alfred Nobelə məktub yazır və onun ayırdığı vəsait hesabına ilk neftin çıxarılması işlərinə başlayır. Binanın tikintisinə 1882-ci ildə başlanılır və 1884-cü ildə isə başa çatdırılır. Elə həmin ildən Nobel ailəsi Bakıya köçür.

Binaya daxil olan kimi IXX-XX əsrlərin abu-havası hiss edilir, qapının girəcəyində ailəyə məxsus qədimi sandıq və böyük şamdanlar görünür. Altı otaqdan ibarət binada Bakıda və regionda ilk dəfə olaraq “Bells” telefonu və havalandırma sistemi quraşdırılıb.

1882-1884-cü illərdə tikilmiş Nobellərin evi 2008-ci ildən muzey kimi fəaliyyət göstərir. Bina ikimərtəbəlidir. Birinci mərtəbədə muzey, ikinci mərtəbə isə Bakı Nobel Neft Klubu və Biznes mərkəzi də yerləşir. Tikilinin interyeri sadə Avropa üslubunda formalaşdırılıb, lakin bir otaq Şərq üslubunda dizayn edilib. Buradakı əşyaların yarısı Nobel ailəsinə məxsus, yarısı isə Nobel İrsi Fondunun keçmiş sədri mərhum Toğrul Bağırzadənin maliyyə dəstəyi ilə tarixi materiallar əsasında toplanıb.

Muzeyin direktoru söyləyir ki, böyük binanın aşağı mərtəbələri idarə üçün ayrılıb. Yuxarı mərtəbələrdə klub, istirahət otaqları və kitabxana yerləşir. Peterburqdan rəssamlıq əsərləri, kitabxana üçün kitablar, bağ üçün heykəllər gətirilmişdi. Otaqlara azərbaycanlı və iranlı xalçaçıların toxuduqları bahalı xalçalar döşənib.

Hazırda muzeydə olan əşyalardan sayca 400-dən çox eksponat Nobel qardaşlarının varislərindən əldə edilib.

Muzeyin direktoru yerli vətəndaşların buraya elə də çox maraq göstərməməsindən şikayətlənir: “Bu tarixi evi görməyə daha çox Avropa ölkələrindən turistlər gəlir”.

Muzeydən ayrılan zaman bu maraqlı məkana girişin ödənişsiz olduğunu da öyrəndik. Ümid edirik ki, xarici turistlərlə yanaşı, paytaxt sakinləri də bu fürsətdən yararlanacaqlar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.