SİYASƏT
YENİ AZƏRBAYCAN PARTİYASI 2008-Cİ İLƏ DAİR HESABATINI AÇIQLAMIŞDIR
İclasda partiyanın 2008-ci ildə fəaliyyəti, görülmüş işlər və qarşıda duran vəzifələr barədə geniş fikir mübadiləsi aparılmışdır. Qeyd olunmuşdur ki, YAP ölkənin ictimai-siyasi həyatında, o cümlədən Azərbaycan Prezidenti İlham Əliyevin uğurla davam etdirdiyi islahatlar və quruculuq proseslərində yaxından iştirak etmiş, ötən ilin ən mühüm siyasi hadisəsi olan prezident seçkilərinin yüksək fəallıq şəraitində təşkil olunmuş təşviqat kampaniyasını uğurla başa çatdırmışdır. Prezident, YAP sədri İlham Əliyevin Yeni Azərbaycan Partiyasının, eləcə də ölkənin ictimai-siyasi həyatında ən mühüm qərarın qəbul olunduğu IV qurultayda söylədiyi nitqində irəli sürülən tezislərin və qarşıya qoyulan vəzifələrin partiyanın gələcək fəaliyyətinin müəyyənləşdirilməsində həlledici istiqamət olduğu bir daha nəzərə çatdırılmışdır.
İclasda gündəliyə uyğun olaraq, YAP İdarə Heyətinin 2008-ci ildə fəaliyyəti ilə bağlı hesabat, partiyanın ümumi tərkibi, o cümlədən gənclər birliyinin və qadınlar şurasının 2009-cu il yanvarın 1-nə olan statistik hesabatı və 2008-ci il üçün maliyyə hesabatı dinlənilmiş və təsdiq edilmişdir.
Statistik məlumata görə, 2008-ci ildə partiyaya 35 min 752 yeni üzv qəbul olunmuş və YAP üzvlərinin ümumi sayı 470 min 605 nəfərə çatmışdır. Qeyd olunmuşdur ki, partiya sıralarında gənclərin xüsusi çəkisi daha da artmış və əvvəlki illərə nisbətən 2008-ci ildə YAP-a üzv qəbul olunanların 52,2 faizini gənc nəslin nümayəndələri təşkil etmişdir. Bütövlükdə, partiya üzvlərinin 39,4 faizini, yəni 185 min 710 nəfərini gənclər, 43,6 faizini, yəni 205 min 114 nəfərini isə qadınlar təşkil etmişdir.
Təsdiq olunmuş maliyyə hesabatında qeyd olunmuşdur ki, YAP-ın 2008-ci ildə mədaxili yığılan üzvlük haqları hesabına 2 milyon 346 min manat təşkil etmişdir. Bu vəsaitin 954 min manatı icra katibliyində və rayon (şəhər) təşkilatlarının aparatlarında çalışan əməkdaşların əmək haqlarının ödənilməsinə sərf olunmuş, 485 min manatı partiyanın IV qurultayının, ümummilli lider Heydər Əliyevin 85 illiyi münasibətilə 2008-ci ilin mayında keçirilən “Demokratiya və sabitlik naminə: əməkdaşlığın yeni imkanları” beynəlxalq konfransın və digər partiya tədbirlərinin təşkilinə, 63 min manatı çap işlərinə, 202 min manatı təsərrüfat xərclərinə, 65 min manatı icarə haqqına, 116 min manatı bank xidməti, kommunal və rabitə xərclərinə, yerdə qalan vəsait cari təmir işlərinə və digər məqsədlərə sərf olunmuşdur.
YAP tərəfindən il ərzində ödənilən gəlir vergisi və Dövlət Sosial Müdafiə Fondunun hesabına köçürülmüş vəsait 260 min manat təşkil etmişdir.
İclasda, həmçinin İdarə Heyətinin 2009-cu il üçün iş planı, 2009-cu il martın 18-də Konstitusiyaya əlavələr və dəyişikliklərlə bağlı keçiriləcək referenduma və 2009-cu ilin bələdiyyə seçkilərinə hazırlıqla əlaqədar tədbirlər planı təsdiq edilmişdir.