“Həkimlərimizi tanıyın” rubrikamızda yüksək ixtisası, peşəkarlığı və zəngin tibbi təcrübəsi ilə seçilən Mərkəzi Gömrük Hospitalının Əməliyyatxana, anesteziologiya və reanimasiya şöbəsinin anestezioloq-reanimatoloqu Mehdi Əliyevi təqdim edirik.

Sağlamlıq insan həyatının ən böyük sərvətidir. İnsan özünü sağlam hiss etdiyi zaman həyatın dəyərini, bəlkə də, tam anlamır. Lakin xəstəlik, xüsusilə də ağır və kritik vəziyyət insanın həyatında hər şeyi bir anda dəyişə bilir. Belə məqamlarda həkimin biliyi, təcrübəsi və verdiyi düzgün qərar bəzən həyatla ölüm arasındakı ən mühüm amilə çevrilir. Anesteziologiya və reanimasiya sahəsində çalışan həkimlər ən ağır vəziyyətlərdə pasiyentin yanında olur, onun sağlamlığının qorunmasına və bərpasına çalışırlar.

Mərkəzi Gömrük Hospitalının Anesteziologiya və reanimasiya şöbəsinin həkim anestezioloq-reanimatoloqu Mehdi Əliyev məhz belə məsuliyyətli və şərəfli missiyanı öz üzərinə götürən həkimlərdəndir. Uzun illər ərzində qazandığı peşəkar təcrübə, beynəlxalq təhsil və müasir tibbi yanaşmalara verdiyi önəm onu öz sahəsinin təcrübəli mütəxəssislərindən birinə çevirib. Mehdi həkim qaraciyər və böyrək transplantasiyası əməliyyatlarında anesteziyanı həyata keçirir, eyni zamanda, əməliyyatdan sonrakı dövrdə pasiyentlərin intensiv müşahidəsi, müalicəsi və tibbi baxımının təşkilini və aparılmasını həyata keçirir.

Təhsil və peşəkarlığa aparan yol

Mehdi Əliyevin tibbə gedən yolu Azərbaycan Tibb Universitetindən başlayıb. O, 1994–2000-ci illərdə universitetin Müalicə işi fakültəsində təhsil alıb. 2000–2001-ci illərdə 1 nömrəli Şəhər Kliniki Xəstəxanasının Anesteziologiya və reanimasiya kafedrasında internatura keçərək həkimlik fəaliyyətinin ilk peşəkar mərhələsinə qədəm qoyub. Lakin onun üçün tibb təhsili diplom almaqla yekunlaşmayıb. Həkimlik sənətində daim yenilənən bilik və texnologiyaları mənimsəməyin vacibliyini əsas götürən Mehdi Əliyev müxtəlif illərdə həm Azərbaycanda, həm də xarici ölkələrdə təhsil və ixtisasartırma proqramlarında iştirak edib.

2007–2011-ci illərdə İtaliyanın Milan şəhərində yerləşən Ospedale Maggiore of Milan xəstəxanasının Anesteziologiya və intensiv terapiya kafedrasında beynəlxalq təqaüd proqramı çərçivəsində təhsil alması onun peşəkar inkişafında xüsusi mərhələ olub.

2012–2013-cü illərdə isə Türkiyənin İzmir şəhərində yerləşən Ege Universitetində ürək-damar cərrahiyyəsi üzrə təhsil keçib. Müxtəlif tibbi məktəblərin təcrübəsini öyrənməsi ona mürəkkəb klinik vəziyyətlərə daha geniş və sistemli yanaşmaq imkanı yaradıb.

Peşəkar fəaliyyət – kritik anlarda böyük məsuliyyət

Mehdi Əliyevin peşəkar fəaliyyəti təcili və intensiv tibbi yardım sahəsində zəngin təcrübə ilə müşayiət olunur. O, 2003–2006-cı illərdə Azərbaycanın özəl tibb müəssisələrindən birində təcili tibbi yardım həkimi kimi çalışıb. Bu illər onun üçün müxtəlif və mürəkkəb klinik vəziyyətlərdə operativ qərar qəbul etmək, pasiyentin vəziyyətini qısa zamanda qiymətləndirmək və təxirəsalınmaz tibbi yardım göstərmək baxımından mühüm təcrübə məktəbi olub.

2012-ci ildən etibarən isə fəaliyyətini Mərkəzi Gömrük Hospitalının Anesteziologiya və reanimasiya şöbəsində anestezioloq-reanimatoloq kimi davam etdirir.

Bu sahədə onun fəaliyyət istiqamətləri kifayət qədər genişdir. Mehdi Əliyev ümumi və regional anesteziya, traxeyanın intubasiyası və ekstubasiyası, mərkəzi damarlara kateterin qoyulması, invaziv və qeyri-invaziv monitorinq, ağciyərlərin invaziv və qeyri-invaziv ventilyasiyası, traxeostomiya, ağrı terapiyası pompasının tətbiqi, onurğa beyin mayesinin alınması, bronxoskopiya və bronxların lavajı kimi müasir tibbi prosedurları həyata keçirir.

Onun fəaliyyətinin mühüm istiqamətlərindən biri də ağır tənəffüs və ürək çatışmazlığı olan pasiyentlərdə EKMO cihazının tətbiqidir. Müasir intensiv terapiyanın ən mürəkkəb və yüksək texnologiyalı metodlarından biri olan EKMO ağır vəziyyətdə olan pasiyentlərin müalicəsində mühüm imkanlar yaradır. Defibrilasiya və kardioversiya kimi həyati əhəmiyyət daşıyan müdaxilələr də Mehdi Əliyevin peşəkar fəaliyyət sahəsinə daxildir.

Beynəlxalq təcrübə və davamlı inkişaf

Müasir tibb sürətlə inkişaf edir. Yeni texnologiyalar, müalicə metodları və tibbi protokollar həkimlərdən biliklərini daim yeniləməyi tələb edir. Mehdi Əliyev də peşəkar fəaliyyətində bu prinsipə xüsusi önəm verir. O, 2005-ci ildə Şotlandiyanın Aberdin Universitetində “Qabaqcıl kardiyak və travma həyat dəstəyi bacarıqları” kursunda iştirak edib. 2010-cu ildə isə Rumıniya Təcili və Fövqəladə Hallar üzrə Tibbi Cəmiyyətinin təşkilatçılığı ilə Təcili və Təxirəsalınmaz Kliniki Hospitalında keçirilən beynəlxalq təlim proqramında, 2024-cü ildə Birləşmiş Ərəb Əmirliklərinin Əbu -Dabi şəhərində Ümumdünya İnsult Təşkilatının təşkilatçılığı ilə keçirilən16-cı Ümumdünya İnsultla Mübarizə Konqresində, 2026-cı il iyunun 6-8-də Niderlandın Rotterdam şəhərində Rotterdam Ahoy konqres mərkəzində keçirilən Avropa Anesteziologiya və İntensiv Terapiya Cəmiyyətinin “Euroanesteziya 2026” illik konqresində iştirak edərək, müvafiq sertifikatlar əldə edib. Müxtəlif ölkələrdə qazandığı təcrübə onun tibbi dünyagörüşünün genişlənməsinə, müasir anesteziologiya və intensiv terapiya yanaşmalarını öz fəaliyyətində tətbiq etməsinə imkan verib.

Elmi fəaliyyətə xüsusi önəm

Mehdi Əliyev üçün həkimlik yalnız klinik fəaliyyətlə məhdudlaşmır. O, elmi istiqamətdə də öz inkişafını davam etdirir. 2022-ci ildən etibarən Akademik M.A. Topçubaşov adına Elmi Cərrahiyyə Mərkəzi PHŞ-də “Anesteziologiya və reanimatologiya” ixtisası üzrə qiyabi doktorantura təhsili alır.

Elmi fəaliyyətə maraq onun tibbin inkişaf edən istiqamətlərini daha dərindən öyrənməsinə, mövcud təcrübəni elmi yanaşmalarla zənginləşdirməsinə və peşəkar biliklərini daha da inkişaf etdirməsinə şərait yaradır.

Peşəkarlığın qiymətləndirilməsi

Uzun illər davam edən peşəkar fəaliyyət və tibb sahəsinə göstərdiyi xidmət dövlət səviyyəsində də qiymətləndirilib. Mehdi Əliyev 2021-ci ildə Azərbaycan Respublikası Səhiyyə Nazirliyinin Fəxri Fərmanı ilə təltif olunub. O, eyni zamanda, bir sıra peşəkar və beynəlxalq tibbi təşkilatların üzvüdür. Bunların sırasında Azərbaycan Reanimatoloqlar və Anestezioloqlar Cəmiyyəti, Avropa Anestezioloqlar Cəmiyyəti, Türkiyə Anesteziologiya və Reanimasiya Cəmiyyəti və Avropa İntensiv Terapiya Təbabəti Cəmiyyəti yer alır. Bu üzvlüklər onun beynəlxalq tibbi mühitlə əlaqələrinin və peşəkar inkişafının davamlı xarakter daşıdığını göstərir.

Həkimlik – biliklə yanaşı, böyük məsuliyyətdir

Anestezioloq-reanimatoloqun işi çox vaxt xəstənin və yaxınlarının ən ağır anlarında başlayır. Bu sahədə çalışan həkimdən yalnız yüksək peşəkarlıq deyil, həm də səbir, diqqət, çeviklik və məsuliyyət tələb olunur.

Çünki reanimasiya şöbəsində hər qərarın öz çəkisi var. Bəzən saniyələr belə böyük əhəmiyyət daşıyır. Belə məqamlarda həkimin biliyi və təcrübəsi qədər onun düzgün qərar qəbul etmək bacarığı da mühüm rol oynayır.

Mehdi Əliyevin uzun illərdir anesteziologiya və reanimasiya sahəsində fəaliyyət göstərməsi, beynəlxalq təcrübəyə malik olması, müasir tibbi texnologiyaları fəaliyyətində tətbiq etməsi və elmi inkişafını davam etdirməsi onun peşəsinə olan bağlılığının göstəricisidir.

2012-ci ildən Mərkəzi Gömrük Hospitalında fəaliyyət göstərən Mehdi Əliyev bu gün də yüksək peşəkarlıq, zəngin təcrübə və məsuliyyətli yanaşması ilə pasiyentlərin sağlamlığının və həyatının qorunmasına xidmət edir.

Mehdi Əliyev haqqında daha ətraflı məlumatla link vasitəsilə tanış ola bilərsiniz.