ABŞ BMT-NİN İNSAN HÜQUQLARI ŞURASINDA ÜZVLÜKDƏN İMTİNA ETMİŞDİR
Amerika məmurlarının sözlərinə görə, onlar ABŞ-ın üzvlüyü məsələsinə təşkilat ancaq tam yaradıldıqdan sonra baxacaqlar.
Hazırda 34 ölkə, o cümlədən Kuba və İran Şuraya namizədliklərini vermişlər. ABŞ-ın imtina etməsinin səbəblərindən biri odur ki, amerikalıların fikrincə, insan hüquqlarının kobud surətdə pozulduğu ölkələr BMT-nin yeni qurumuna üzv olmaq imkanı almışdır.
ABŞ-ın BMT-dəki səfiri Con Bolton bildirmişdir ki, onun ölkəsi Birləşmiş Millətlər Təşkilatının strukturunda iştirakını tamamilə istisna etmir. O demişdir: “Biz İnsan Hüquqları Şurasınının güclü və səmərəli olması üçün digər üzv dövlətlərlə əməkdaşlıq edəcəyik”.
Şuranın iştirakçı dövlətlərinin ümumi sayı 47-yə çatmalıdır. Seçkilər prosedurasından sonra onların ilk görüşü iyunun 19-da Cenevrədə (İsveçrə) olacaqdır. Şuranın üzvləri iki ildən üç ilədək müddətə seçiləcəklər.
Xatırladaq ki, BMT Baş Məclisi İnsan Hüquqları Şurası yaradılması ideyasını keçən ay bəyənmişdir. Bu qurum İnsan Hüquqları Komissiyasını əvəz etməlidir. Baş katib Kofi Annanın fikrincə, Komissiya həddən artıq siyasiləşmiş və tez-tez tənqid edildiyinə görə nüfuzunu itirmişdir.
Bölmənin digər xəbərləri
