ABŞ-da atəşaçma nəticəsində iki nəfər həlak olub
Vaşinqton, 28 mart, AZƏRTAC
Vaşinqton ştatının Sietl şəhərində naməlum kişi əlində tapança evdən çıxaraq küçədəki maşını qaçırmağa çalışıb. O, odlu silahla 56 yaşlı sürücü qadını vuraraq hadisə yerindən qaçıb. Qadın sağ qalıb və yerli xəstəxanaya çatdırılıb, lakin onun vəziyyəti ağırdır.
AZƏRTAC xəbər verir ki, sonra cinayətkar başqa bir avtomobili qaçırmağa cəhd göstərib. O, bu avtomobilin sahibini də güllə ilə vurub. Sürücü yerindəcə keçinib. Polislər cinayətkarı oğurlanmış avtomobildə o, trasdakı başqa maşına çırpılana qədər təqib ediblər. Həmin maşının sürücüsü də hadisə yerində həlak olub.
Cinayətkar sağ qalıb və həbs edilib. Polisin verdiyi məlumata görə, o, ciddi yaralanmayıb. Sietl polisi rəisinin müavini Mark Qart Qrin deyib ki, şübhəli şəxs təkbaşına hərəkət edib. İstintaq hadisənin başvermə səbəblərini araşdırır.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
