ABŞ-DA AZƏRBAYCANA MARAQ GETDİKCƏ ARTIR
Azərbaycanın ABŞ-dakı səfiri Yaşar Əliyev AZƏRTAC-a bildirmişdir ki, Amerikada Azərbaycana maraq getdikcə artır. Amerika Konqresində Cənubi Qafqazla bağlı aparılan dinləmələr bu reallığı ortaya qoymuşdur. Səfirlik Azərbaycanın Konqresdə Dağlıq Qarabağla bağlı mövqeyinin müdafiəsi istiqamətində fəaliyyətini davam etdirir. Artıq Konqresdə Ermənistana həsr olunan dinləmələrin keçirilməsi ilə bağlı ermənipərəst qurumların yaydıqları məlumatlar təkzib olunmuşdur.
Diplomat demişdir ki, ABŞ Konqresində Cənubi Qafqaza həsr olunan dinləmələr zamanı Azərbaycanı dəstəkləyən konqresmenlər konkret mövqe nümayiş etdirmişlər. Azərbaycan işçi qrupunun həmsədri Bil Şuster yazılı şəkildə xüsusi bəyanat yaymış və sonra da bu bəyanatı oxumuşdur. Sənəddə ABŞ-da Azərbaycana böyük maraq olduğu, ölkələrimizin əlaqələrinin strateji tərəfdaşlıq səviyyəsinə çatdığı və əməkdaşlığımızın hər iki tərəf üçün səmərəli olduğu xüsusi qeyd olunmuşdur.
Bölmənin digər xəbərləri
