ABŞ-da keçmiş prezident Cimmi Karterlə vida mərasimi keçirilir
Bakı, 9 yanvar, AZƏRTAC
Paytaxt Vaşinqtonda ABŞ-ın 39-cu prezidenti Cimmi Karterlə vida mərasimi keçirilir.
AZƏRTAC-ın məlumatına görə, rəsmi mərasim yerli vaxtla saat 10:00-da (Bakı vaxtı ilə 19:00) Vaşinqton Milli Katedralında başlayacaq. Hazırda keçmiş prezidentin tabutu 21 tüfəngli hərbçinin müşayiəti ilə Kapitol binasından Milli Katedrala doğru yola düşüb.
39-cu prezidentin rəsmi dəfn mərasimində ABŞ-ın hazırda həyatda olan beş keçmiş prezidentinin hamısı bir araya gələcək. Mərasimdə prezident Baydenin çıxışı nəzərdə tutulub.
Cimmi Karterin cənazəsi rəsmi mərasim bitdikdən sonra doğulduğu Corciya ştatının Pleyns şəhərində dəfn ediləcək.
Keçmiş prezidentin ölümü ilə bağlı ABŞ prezidenti Cozef Bayden yanvarın 9-nu milli matəm günü elan edib.
Cimmi Karter dekabrın 29-da 100 yaşında vəfat edib.
Məlahət Nəcəfova
AZƏRTAC-ın xüsusi müxbiri
Vaşinqton
Bölmənin digər xəbərləri
