ABŞ DÖVLƏT DEPARTAMENTİ AZƏRBAYCANDA İNSAN HÜQUQLARI İLƏ BAĞLI MƏRKƏZ YARATMAQ NİYYƏTİNDƏDİR

20.10.2004 [15:47]
Çap et
A⁺ A^-

AZƏRTAC xəbər verir ki, Azərbaycanda səfərdə olan ABŞ Dövlət Departamentinin Cənubi Qafqaz ölkələri üzrə insan hüquqları və demokratiya bürosunun nümayəndəsi Vendi Silverman oktyabrın 20-də Milli Məclisin beynəlxalq münasibətlər və parlamentlərarası əlaqələr daimi komissiyasının sədri Səməd Seyidovla görüşmüşdür.

Qonağı səmimi salamlayan Səməd Seyidov Milli Məclisin fəaliyyəti, ölkəmizdə insan hüquq və azadlıqlarının müdafiəsi istiqamətində atılan addımlar, AŞPA-dakı Azərbaycan parlament nümayəndə heyətinin işi barədə ətraflı məlumat vermişdir.

Azərbaycana üçüncü dəfə gəldiyini və hər dəfə gördüyü dəyişikliklərdən məmnun qaldığını vurğulayan Vendi Silverman demişdir ki, onun əsas məqsədi Cənubi Qafqaz ölkələrində insan hüquqları və demokratiyanın inkişafı ilə bağlı məruzə hazırlamaqdır. ABŞ Dövlət Departamentinin Cənubi Qafqaz üzrə insan hüquqları və demokratiya bürosu Azərbaycanda insan hüquqları və demokratiya üzrə mərkəz yaratmaq üçün proqram hazırlamışdır. Proqramın icrası Demokratiya İnstitutuna həvalə olunmuşdur.

Sonra görüşdə qarşılıqlı maraq doğuran digər məsələlər ətrafında fikir mübadiləsi aparılmışdır.