ABŞ hərbi gözətçilərinin İraq ərazisindəki həbsxanalarda saxlanılan məhbuslarla təhqiramiz rəftar etməsi kütləvi xarakter daşımır. AZƏRTAC-ın İTAR-TASS agentliyindən aldığı xəbərə görə, bunu ABŞ Silahlı Qüvvələri Qərargah Rəisləri Komitəsinin başçısı general Riçard Mayers Amerika hərbçilərinin Bağdad yaxınlığındakı Əbu-Qreyb həbsxanasında məhbusları alçaltmaları ilə əlaqədar rüsvayçılığı şərh edərkən bildirmişdir. Mayers Ey-Bi-Si teleşirkətinə müsahibəsində ABŞ hərbi qulluqçularının İraqda əsirlər barəsində pozuntulara müntəzəm surətdə yol verdiklərinə dair hər hansı sübut-dəlil olmadığını söyləmişdir.

Əbu-Qreybdəki pozuntular haqqında ABŞ ordusunun xidməti istifadə üçün nəzərdə tutulan məruzəsindən KİV-lərə sızan məlumata görə, bu həbsxanadakı əsirlər “cinayət kimi cəzalandırılmalı olan sadist, vulqar və əxlaqsız təhqirlərə məruz qalmışlar”. Hərbçilər bəzi məhbusların bədənlərində söyüşlər yazmışlar.

Mayers demişdir ki, hazırda Əbu-Qreybdə tətbiq edilmiş “dindirmə üsulları” ətraflı araşdırılır. “İşgəncələr bizim istifadə etdiyimiz və ya istifadə olunmasına icazə verdiyimiz üsul deyildir”. O demişdir ki, həbsxanada təhqirlərdə təqsirli bilinən 6 hərbi qulluqçu hərbi tribunal qarşısında cavab verəcəkdir. İndi onlar həbsxanadadır və təhqiqat müddətində orada qalacaqlar.