ABŞ-ın 14 ştatında həftə ərzində koronavirusa yoluxanların sayı artıb
Vaşinqton, 11 iyun, AZƏRTAC
İyunun əvvəlindən Amerikanın 14 ştatında və Puerto-Rikoda koronavirusa yeni yoluxma hallarının sayında ən yüksək həftə göstəricisi qeydə alınıb.
AZƏRTAC xəbər verir ki, Alyaska, Arizona, Arkanzas, Kaliforniya, Florida, Kentukki, Nyu-Meksiko, Şimali Karolina, Missisipi, Oreqon, Cənubi Karolina, Tennessi, Texas və Yuta ştatlarında yoluxanların sayının artdığı bildirilir.
Yoluxanların sayı yenidən açılmış müəssisələrdə və insanların sıx toplaşdığı yerlərdə, o cümlədən restoran, hovuz və çimərliklərdə artmağa başlayıb. Belə ki, iyunun birinci həftəsində Yuta ştatının Bear-Riverdəki səhiyyə şöbəsi 78 yeni yoluxma halı qeydə alıb. Burda yoluxanların sayının yüksək olması ştatın Xayram şəhərciyindəki ət emalı zavodunda koronavirusun geniş yayılması ilə əlaqələndirilir.
Turizm sənayesinin inkişaf etdiyi Florida və Cənubi Karolina kimi ştatlarda xüsusi riskli vəziyyətin davam etdiyi bildirilir. Ölkənin hər yerindən minlərlə amerikalının bu ştatlardakı kurortlara getməyə tələsməsi, çox güman ki, virusun bundan sonra da geniş yayılmasına səbəb olacaq. Eyni zamanda, son günlər polis qəddarlığına qarşı keçirilən etiraz aksiyalarının yoluxma hallarının artmasına təsir göstərəcəyi vurğulanır.
Amerika Birləşmiş Ştatlarında iyunun 10-dək azı 115 min 130 nəfər koronavirusdan həyatını itirib. Ölkədə koronavirusa 2 milyondan çox yoluxma halı qeydə alınıb.
AZƏRTAC-ın Vaşinqton bürosu
Vaşinqton
Bölmənin digər xəbərləri
