DÜNYA
ABŞ iqtisadiyyatının pandemiyadan sonra bərpası azı bir il çəkə bilər
Vaşinqton, 18 may, AZƏRTAC
Bir çox amerikalı iqtisadçılar ABŞ iqtisadiyyatının qarşıdakı iki rübdə vəziyyəti ilə bağlı bədbin proqnozlar verməkdə davam edirlər. ABŞ-ın Federal Ehtiyatlar Sisteminin sədri Cerom Pauel bildirib ki, COVID-19 pandemiyasının nəticələrini aradan qaldırmaq üçün ABŞ-ın iqtisadiyyatına bir ildən çox vaxt tələb oluna bilər.
AZƏRTAC xəbər verir ki, Pauel “60 dəqiqə” adlı məşhur televiziya proqramına müsahibəsində iqtisadiyyatın bərpasına aparan yolun hazırda qeyri-müəyyən olduğunu vurğulasa da, bu prosesin 2021-ci ilin əvvəlində başlaya biləcəyinə ümid bəslədiyini bildirib.
“İndi böyük əzab-əziyyətlər və çətinliklər dövrüdür. Bu dövr elə tez və güclü başladı ki, artıq insanların yaşadığı ağrıları və hiss etdikləri qeyri-müəyyənliyi sözlə ifadə etmək mümkün deyil”, - deyən Pauel onu da əlavə edib ki, iqtisadi reabilitasiya son nəticədə amerikalıların COVID-19-un yaratdığı təhlükədən nə dərəcədə qoruna biləcəklərinə əminlikdən asılı olacaq.
AZƏRTAC-ın Vaşinqton bürosu