ABŞ KONQRESİ ÇERNOBIL QƏZASI İLƏ ƏLAQƏDAR QƏTNAMƏ QƏBUL ETMİŞDİR

06.04.2006 [11:35]
Çap et
A⁺ A^-

AZƏRTAC-ın Ukrinformdan aldığı xəbərə görə, ABŞ Konqresinin Nümayəndələr palatası Çernobıl atom elektrik stansiyasında qəzanın nəticələrini aradan qaldırmaq səylərini dəstəkləmək barədə qətnamə qəbul etmişdir. Qəzanın 20-ci ildönümünə həsr olunan sənədi konqresmenlərin əksəriyyəti bəyənmişdir. Qətnamədə deyilir ki, Çernobıl qəzasının nəticələri zərərçəkən rayonlardakı adamların həyatına və sağlamlığına hələ də təsir göstərir. Bunu aradan qaldırmaq üçün yaxın onilliklərdə humanitar kömək və elmi tədqiqatlar tələb olunacaqdır.

Nümayəndələr palatası qəza bölgələrində əhalinin sağlamlığına radioaktiv çirklənmənin təsirini öyrənmək səylərini birləşdirmək çağırışı ilə milli və beynəlxalq səhiyyə təşkilatlarına müraciət etmişdir. Konqresmenlər AES-in qəza vəziyyətində olan dördüncü bloku üzərində yeni sipərin tikintisi layihəsini maliyyələşdirərək, obyekti ekoloji baxımdan təhlükəsiz sistemə çevirmək məqsədi ilə yaradılan “Örtük” Beynəlxalq Çernobıl Fonduna ABŞ-ın yardım göstərmək səylərini də dəstəkləmiş və digər dövlətləri də buna çağırmışlar.

Yeni müdafiə örtüyü AES-in 1986-cı ildə qəzaya uğrayan reaktoru üzərində tikiləcəkdir. Çernobıl örtüyünün vəziyyətini qlobal problem kimi qiymətləndirən 28 donor ölkə dörd il əvvəl 758 milyon dollar təmənnasız yardım ayırmaq qərarına gəlmişdir.

Ukraynanın bu ilin dövlət büdcəsində enerji bloklarını və “Örtük” obyektini təhlükəsiz vəziyyətdə saxlamaq üçün 283,4 milyon qrivna (təxminən 56 milyon dollar) nəzərdə tutulmuşdur.

ABŞ KONQRESİ ÇERNOBIL QƏZASI İLƏ ƏLAQƏDAR QƏTNAMƏ QƏBUL ETMİŞDİR

MÜƏLLİFLƏ ƏLAQƏ

Bölmənin digər xəbərləri