ABŞ Konqresi İrana qarşı yeni sanksiyalar hazırlayır
Tehran, 11 iyun, AZƏRTAC
ABŞ Konqresində təmsil olunan 13 respublikaçı konqresmen İrana qarşı yeni sanksiyaların tətbiqi barədə sənəd hazırlayıb.
AZƏRTAC xəbər verir ki, bu barədə Fars agentliyi məlumat yayıb.
Məlumatda qeyd olunub ki, Konqresin rəhbərliyinə təqdim olunan sənəd 111 səhifədən və 25 tövsiyədən ibarətdir. Təklif və tövsiyələrin nədən ibarət olması haqqında məlumat yoxdur. Lakin sənədin preambula hissəsində göstərilib ki, ABŞ-ın milli maraqlarına uyğun olaraq siyasi və iqtisadi sahələrdə İrana qarşı sanksiyaları daha da sərtləşdirmək lazımdır. Sənəd Konqresin müzakirəsinə çıxarılacaq.
İran Prezidenti Həsən Ruhani yeni iqtisadi layihələrin açılışı zamanı bəyan edib ki, sanksiyalar ölkə iqtisadiyyatına mənfi təsir göstərir. Lakin heç kim İran xalqının iradəsini sındıra bilməz. Prezident nəzərə çatdırıb ki, sanksiyalara baxmayaraq, İran iqtisadiyyatında inkişaf müşahidə edilir. Ölkə dünyada polad istehsalı üzrə 10-cu yerdən 8-ci yerə yüksəlib. İranda ildə 55 milyon ton polad istehsal edilir.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
