İranla sərhəddə yerləşən Azərbaycanın zəbt edilmiş Dağlıq Qarabağ ərazisində narkotik maddələrin dövriyyəsi, silah alveri, terrorçular hazırlayan düşərgələr mövcuddur. Bunu respublikaçı konqresmen Ted Po ABŞ Konqresinin Nümayəndələr palatasındakı çıxışında bəyan etmişdir. O, spikerə müraciətlə demişdir ki, Ermənistan Azərbaycanın ərazisini işğal etdikdən bəri bu kimi fəaliyyət İranın dəstəyi ilə baş verir. Nə qədər ki, Ermənistan bu əraziləri işğal altında saxlayır, Azərbaycan belə halları aradan qaldırmağa qadir deyildir. İran Azərbaycanda mədrəsələr açmağa, vizasız gediş-gəliş yaratmağa çalışır. İran Azərbaycanın hava məkanını mütəmadi olaraq pozur, neft və qaz yataqlarına göz dikibdir. İsrail və ABŞ-la möhkəm əlaqələrinə görə Azərbaycan İranın hədələrinə məruz qalır. Konqresmen hesab edir ki, İranın qonşusu kimi Azərbaycan Birləşmiş Ştatlara hərbi və kəşfiyyat baxımından kömək edə bilər.
Ted Po çıxışında Azərbaycanın ABŞ üçün mühüm strateji müttəfiq olduğunu da vurğulamışdır. O demişdir ki, Qərbin enerji mənbəyi olan Xəzər hövzəsində yerləşən Azərbaycan OPEK-in üzvü olmayan hasilatçı kimi Bakı-Tbilisi-Ceyhan kəməri vasitəsilə 2005-ci ilin dekabrında fəaliyyətə başlayandan sonra gündə 1,6 milyon barrel neft nəql edəcəkdir. Azərbaycan İraq, Əfqanıstan və Kosovoya qoşun göndərən ilk və yeganə şiə müsəlman dövlətdir. Keçmiş Sovet İttifaqı məkanında demokratiyaların ön sıralarında gedən Azərbaycan noyabrın 6-da parlament seçkiləri keçirəcək və beynəlxalq birliyin dəstəyi ilə bu prosesin azad və ədalətli olması istiqamətində addımlayır.
