ABŞ qoşunlarının Suriyadan çıxarılması senatorlarda narahatlıq doğurur
Bakı, 20 dekabr, AZƏRTAC
ABŞ-ın hər iki siyasi partiyasını təmsil edən senatorlar qrupu Amerika qoşunlarının Suriyadan çıxarılması barədə qərarına yenidən baxması üçün Prezident Donald Trampa məktub ünvanlayıb.
AZƏRTAC TASS informasiya agentliyinə istinadla xəbər verir ki, senatorların fikrincə, ABŞ qoşunlarının Suriyadan çıxarılması Rusiya və İranın regiondakı mövqeyinin güclənməsinə səbəb ola bilər. “Rusiya və İran münaqişədən istifadə edərək regionda təsirini artırıb. Müşahidə ediləcək istənilən zəiflik onların regiondakı mövcudluğunun artması ilə nəticələnəcək. Tərəfdaş və müttəfiqlərimizin bizə etibarı isə azalacaq”, - məktubda belə yazılıb.
Senatorlar, həmçinin bu addımın İŞİD qruplaşmasının yenidən fəallaşmasına, Bəşər Əsədin hakimiyyətinin möhkəmlənməsinə gətirib çıxaracağını düşünürlər.
Xatırladaq ki, Donald Tramp dünən ABŞ qoşunlarının Suriyadan tamamilə çıxarılmasına dair sərəncam verib. O, Twitter səhifəsində yazıb ki, ABŞ İŞİD üzərində qələbə qazanıb və bu, Amerika hərbi kontingentinin Suriyada qalmasının yeganə məqsədi idi.
Bölmənin digər xəbərləri
