ABŞ RUSİYANIN NÜVƏ POTENSİALINI BİR ZƏRBƏYƏ MƏHV EDƏ BİLƏR?

05.04.2006 [17:14]
Çap et
A⁺ A^-

AZƏRTAC xəbər verir ki, martın axırlarında Amerikanın “Forin Affrs” jurnalında dərc olunmuş məqalədə ölkənin təhlilçiləri bildirmişdilər ki, ABŞ 40-cı illərdə malik olduğu nüvə hegemonluğunu özünə qaytarmışdır. İndi əgər ABŞ Rusiyaya nüvə zərbəsini birinci endirsə, onun buna cavab verməyə imkanı olmayacaqdır. Jurnalın ekspertləri qeyd edirlər ki, nüvə çəkindirməsi modeli daha işləmir.

ABŞ təhlilçiləri nüvə dövlətləri qüvvələrinin tarazlığındakı bu cür radikal dəyişikliyin bir neçə səbəbini göstərirlər: ABŞ-ın nüvə sistemləri təkmilləşib, Rusiyanın cəbbəxanası sürətlə tənəzzülə uğrayır.

Məqalə müəlliflərinin fikrincə, SSRİ ilə müqayisədə Rusiyada strateji bombardmançı təyyarələrin sayı 39 faiz, qitələrarası ballistik raketlərin sayı 58 faiz və ballistik raketlər olan sualtı qayıqların sayı 80 faiz azalmışdır.

Amerika ekspertləri nəzərə çarpdırırlar ki, Rusiya hərbçiləri ancaq yerüstü radarlara güvənirlər. Lakin Rusiyanın şərqində, Sakit okean sahillərindəki bu cür erkən aşkarlama şəbəkəsinin qüsurları var. Bu regiondakı sualtı qayıqlardan raketlər buraxılarsa, Kreml bundan döyüş başlıqları ancaq partladıqdan sonra xəbər tutacaqdır.

Jurnal yazır ki, Rusiya radarları Şimali Atlantika rayonlarında da bütün əraziyə nəzarət etmir. Beləliklə, həmin əraziyə raketlər buraxılarsa, Rusiya hərbçilərinin cavab hərəkətləri üçün cəmi iki dəqiqə vaxtı qalacaqdır. Bundan başqa, Rusiyanın hava hücumundan müdafiə sistemi B-2 tipli görünməz bombardmançı təyyarələri tuta bilməz.

Rusiyanın hərbi ekspertləri isə jurnalın bu məqaləsindəki tezisləri fitnəkarlıq və şişirtmə adlandırmışlar.