ABŞ və Fransanın qərəzli mövqeyi Ermənistanla sülh müqaviləsinin imzalanmasına ən böyük maneədir - RƏY
Bakı, 25 noyabr, AZƏRTAC
“ABŞ və Fransanın Azərbaycan-Ermənistan arasında bağlanacaq sülh müqaviləsinə münasibəti siyasi və geosiyasi maraqlara söykənən və prinsip etibarilə sülhə nail olmağa maneə törədən məkrli və məqsədli fəaliyyətdir. Əslində, bu fəaliyyət həmin dövlətlərin BMT Nizamnaməsi ilə müəyyən olunan öhdəliklərinə - beynəlxalq sülhü və təhlükəsizliyi qoruyub saxlamaq, sülhə təhlükənin qarşısını almaq və onu aradan qaldırmaq, təcavüz aktlarını və digər sülhün pozulması hallarının qarşısını almaq üçün səmərəli kollektiv tədbirlər görmək, sülhün pozulmasına gətirib çıxara bilən beynəlxalq mübahisə və situasiyaların dinc vasitələrlə, ədalət və beynəlxalq hüququn ümum qəbul edilmiş prinsip və normalarına uyğun həll olunmasına müvəffəq olmaq məqsədinə və dövlətlərin suveren bərabərlik prinsipinə uyğun deyil”.
Bu fikirləri AZƏRTAC-a müsahibəsində Bakı Dövlət Universitetinin Hüquq fakültəsinin dekanı Zaur Əliyev söyləyib.
Dekan vurğulayıb ki, ABŞ və Fransanın qərəzli mövqe tutması, regionda yeni silahlı münaqişə ocaqlarının alovlanmasına, terrorizmin, separatizmin, ekstremizmin yayılmasına zəmin yaradır və qeyd olunan əməlləri qadağan edən bir sıra beynəlxalq konvensiyaların müddəalarını kobud surətdə pozur.
Z.Əliyev bildirib ki, ABŞ və Fransanın erməni “təəssübkeşliyi” bir tərəfdən davamlı olaraq Ermənistanın siyasi iradəsini girov altında saxlayır, digər tərəfdən onun məlum dövlətlərin təcavüzkar layihəsi kimi çıxış etməsini şərtləndirir:
“Təcavüzkar layihə beynəlxalq sülhün və təhlükəsizliyin “təminatını” üzərinə götürmüş bu dövlətlərin təcavüzə, beynəlxalq cinayətlərə qarşı durmaq öhdəliklərini də pozur”.
Zaur Əliyev deyib ki, ABŞ və Fransanın qərəzli mövqeyi Z.Bzejinskinin məlum “Xəzər hövzəsinə nəzarət” konsepsiyasına əsaslanmaqla regionun iqtisadi inkişafına, regional və subregional iqtisadi inteqrasiyaya ciddi təhlükə və təhdiddir. Belə ki, Zəngəzur dəhlizinin reallaşdırılması ABŞ-ın dəniz ticarət daşımalarında maraqlarına istər-istəməz zərbə vuracaq. Odur ki, bu dövlət özünün bütün imkanlarından istifadə edərək region ölkələrinin iqtisadi müstəqilliklərinə maneə törətməyə çalışır.
“Regional, o cümlədən universal təhlükəsizliyin hüquqi əsasını formalaşdıracaq sülh müqaviləsinin bağlanması “Orta dəhliz” və ya “Tarixi ipək yolu” layihəsinin Zəngəzur dəhlizi də daxil olmaqla şaxələndirilmiş variantda həyata keçirilməsinə, Azərbaycana qarşı aparılan təcavüz və soyqırımı siyasətinə, Türkiyəyə qarşı yalançı soyqırımı və ərazi iddialarına son qoyulmasına, BMT Təhlükəsizlik Şurasının daimi üzvü kimi Fransanın qanunsuz erməni “təəssübkeşliyi”nin neytrallaşdırılmasına, Ermənistan üçün BMT-nin Beynəlxalq Məhkəməsində “vəkillik”, BMT Təhlükəsizlik Şurasında “qəyyumluq” funksiyasının yerinə yetirilməsinə yönəlik region siyasətinin, həmçinin Fransa şirkətlərinin “imtiyazlı tərəfdaşlıq” fəaliyyətinə son qoyulmasına zəmin yaradacaq”, - deyə Zaur Əliyev bildirib.
O vurğulayıb ki, ABŞ və Fransanın ayrı-seçkiliyə və ədalətsizliyə əsaslanan qərəzli mövqeyi Cənubi Qafqazda sabitliyə, təhlükəsizliyə gətirib çıxarmalı olan Azərbaycan-Ermənistan sülh müqaviləsinin imzalanmasına ən böyük maneədir.
Bölmənin digər xəbərləri
