Abşeron yarımadasının dayazsulu hissəsi layihəsi üzrə üçüncü kəşfiyyat quyusu bağlanıb
Bakı, 13 iyun, AZƏRTAC
BP Abşeron yarımadası ətrafında dayazsulu hissəsi (AYDH) layihəsi üzrə üçüncü geoloji-kəşfiyyat quyusu mayın 25-də təhlükəsiz şəkildə bağlanıb və daimi tərk edilib.
Bu barədə AZƏRTAC-a AYDH-in kəşfiyyatı, işlənməsi və hasilatın pay bölgüsü haqqında Saziş üzrə operatoru olan “BP-Azerbaijan”dan bildirilib.
Qeyd edilib ki, Saziş sahəsinin Cənub Şərq perspektiv hissəsində yerləşən Qarabatdağ ərazisində qazılmış bu quyuda iqtisadi cəhətdən səmərəli karbohidrogen ehtiyatları aşkarlanmayıb. Qarabatdağ geoloji-kəşfiyyat quyusu (QBDX01) AYDH layihəsinin kəşfiyyat qazma proqramı üçün planlaşdırılmış fəaliyyətlərin sonuncu mərhələsi olduğundan “Satti” özüqalxan qazma qurğusu AYDH proqramında iştirakını bitirib.
QBDX01 kəşfiyyat quyusu sahildən təqribən 7 kilometr aralı suyun dərinliyi təqribən 6 metrə çatan ərazidə qazılmışdı. Quyunun qazılmasına aprelin 4-də başlanmışdı və əsas quyunun ümumi dərinliyinin 2155 metrə çatacağı planlaşdırılırdı. Əsas hədəfdə karbohidrogen ehtiyatları müşahidə olunmadığından qazma əməliyyatları 2185 metr dərinlikdə dayandırılıb.
BP AYDH layihəsinin operatorudur və kəşfiyyat, işlənmə və hasilatın pay bölgüsü haqqında sazişdə 25 faiz iştirak payına malikdir. Digər tərəfdaşlar bunlardır: SOCAR-ın Ortaq Neft Şirkəti - 50 faiz və LUKoil - 25 faiz.
Bölmənin digər xəbərləri
