ABXAZLAR KODORİ DƏRƏSİNDƏ GÜRCÜ POLİSİNİ ATƏŞƏ TUTMUŞLAR
AZƏRTAC-ın xüsusi müxbiri xəbər verir ki, abxaz separatçıları gürcü-abxaz münaqişəsi bölgəsində, Kodori dərəsində keşik çəkən gürcü polis dəstəsini atəşə tutmuşlar.
Üç gürcü polisi yaralanmışdır. Onlardan birinin vəziyyəti ağırdır. Gürcü tərəfinin məlumatına görə, cavab atəşi nəticəsində abxaz separatçıları arasında yaralananların, hətta tələfatın olduğu bildirilir. Gürcüstanın reinteqrasiya məsələləri üzrə dövlət naziri Temur Yakobaşvili demişdir: “Kodori dərəsində törədilmiş fitnəkarlıq vəziyyəti kimin gərginləşdirməyə çalışdığını və müharibə istədiyini açıq-aydın əks etdirdi. Gürcülərlə abxazlar arasında baş vermiş toqquşma nəticəsində abxaz tərəfindən 4 nəfər həlak oldu. Gürcülər buraya BMT missiyasının xahişi ilə gəlib, ərazinin monitorinqi keçirilirdi və nəticədə abxaz tərəfinin qanunsuz məntəqəsi aşkar olundu”.
Gürcüstan daxili işlər nazirinin müavini Yekaterine Zğuladze jurnalistlərə demişdir: “Son bir həftə ərzində münaqişə bölgələrində fitnəkarlığın sayı artmışdır. Bu o deməkdir ki, sülh prosesini pozmaq məqsədi güdən müəyyən plan hazırlanır. Sülh proqramını sual altında qoymaq tamamilə yolverilməzdir. Bu fitnəkarlıqlar zamanı gürcü polisi özünü ələ almaqda və peşəkarlıqda fərqlənir”.
Bölmənin digər xəbərləri
