AZƏRTAC-ın müxbiri xəbər verir ki, Azərbaycan Prezidenti İlham Əliyev sentyabrın 24-də Qazax rayonuna səfərini başa çatdıraraq, Ağstafa rayonuna gəlmişdir.

Həmin gün Ağstafa şəhərində Heydər Əliyev Mərkəzinin açılışı oldu. Açılış mərasiminə gələn dövlətimizin başçısı əvvəlcə ulu öndər Heydər Əliyevin mərkəzin həyətində ucaldılmış abidəsi önünə gül dəstəsi qoydu. Abidənin müəllifi, xalq rəssamı, akademik Ömər Eldarovdur.

Prezident İlham Əliyev mərkəzin açılışını bildirən lenti kəsdi.

Mərkəzin tikintisinə bu ilin martında başlanmışdır. 3,7 hektar ərazidə Heydər Əliyev Muzeyi, 450 yerlik konsert salonu, 20 və 50 yerlik konfrans salonları, kino salonu, elektron kitabxana, linqafon və internet otaqları, sərgi salonu vardır. Burada açıq havada tədbirlər keçirmək üçün də şərait yaradılmışdır. Məktəblilər burada təşkil ediləcək internet və xarici dil kurslarında məşğul olacaqlar.

Bir-birinə bitişik 3 korpusdan ibarət tikintinin sifarişçisi Heydər Əliyev Fondu, podratçı isə “Akkord” şirkətlər qrupudur.

Mərkəzin həyəti Hollandiyadan gətirilmiş gül və ağac kolları ilə bəzədilmişdir. Burada quraşdırılan fəvvarə həyətə xüsusi gözəllik verir.

Dövlətimizin başçısı Heydər Əliyev Muzeyi, konfrans salonları, elektron kitabxana, linqafon və internet kabinetləri ilə tanış oldu.

Mərkəzlə tanışlıqdan sonra Prezident İlham Əliyev burada rayon veteranları ilə görüşüb söhbət etdi.

Rayon Ağsaqqallar Şurasının sədri MƏMMƏD MƏSMƏLİYEV dövlətimizin başçısına müraciətlə dedi:

- Cənab Prezident, Ağstafa rayonuna xoş gəlmisiniz! Son illərdə respublikamızda böyük işlər görülmüşdür. Hər yerdə abadlıq işləri gedir, məktəblər, yeni xəstəxanalar tikilir. O cümlədən Ağstafa rayonunda da yaxşı işlər görülmüşdür. Ağstafa camaatı Sizdən çox razıdır, Allah Sizə cansağlığı versin. Heydər Əliyev Fondunun hesabına rayonda 3 məktəb tikilibdir, bu mərkəz də həmin Fondun hesabına tikilibdir. Tikiş fabrikinin açılış mərasimində də olacaqsınız. Mən deyərdim ki, son illərdə respublikada işsizliyin aradan qaldırılması, 700 min nəfərin işlə təmin olunması üçün görülən işlər həmin fabrikdə 1000 nəfərlik iş yerinin açılması ilə yekunlaşır. Ona görə Sizə uğurlar, uzun ömür, cansağlığı arzu edirəm. Bu, bizim xalqımızın müvəffəqiyyətidir, Azərbaycan xalqının rifahının yaxşılaşmasıdır.

İLHAM ƏLİYEV: Sağ olun, təşəkkür edirəm. Mən də sizi bu gözəl mərkəzin açılışı münasibətilə ürəkdən təbrik edirəm. Doğrudan da, mərkəzin həm xarici görünüşü, həm də daxili tərtibatı çox gözəldir. Misal üçün, Heydər Əliyev Muzeyində olan fotoşəkillər çox nadir şəkillərdir. Hətta mən dedim ki, onlardan bəzilərini Bakıya, Heydər Əliyev Fonduna göndərsinlər. Çünki, o şəkillər müxtəlif vaxtlarda çəkilib və ola bilsin, onların bəziləri bizdə arxivdə yoxdur.

Burada həm böyük, həm kiçik iclas zalları, uşaqlar üçün dərnək, rəssamlıq dərnəyi, rəsm qalereyası, kompyuter otağı, xarici dilləri öyrənmək üçün linqafon otağı var. Yəni, sözün əsl mənasında, mərkəzdir və ətrafı da çox gözəldir. Əlbəttə ki, siz yəqin yaxşı xatırlayırsınız, burada heç nə yox idi. İndi gözəl park salınıb, fəvvarələr, oturacaqlar var, yəni burada insanlar həm dincələ bilərlər, həm də vaxtlarını səmərəli keçirə bilərlər. Gənclər də gəlib burada elektron kitabxana vasitəsilə dünyanın bütün kitabxanalarına daxil ola bilərlər. Yəni bu mərkəzin çox böyük mənası var və mən çox şadam ki, məhz Ağstafa rayonunda belə gözəl mərkəzin tikintisinə nail ola bilmişik. Bu mərkəzin fəaliyyəti və Ağstafa rayonunun inkişafına da böyük kömək göstərəcəkdir. Çünki gənclər bilikli, savadlı olmalıdırlar. Bütün rayonlarımızda yeni tikilən obyektlər müasir olmalıdır.

MƏMMƏD MƏSMƏLİYEV: Bu işlər Sizin fəaliyyətiniz nəticəsində görülübdür. Bu mərkəzdəki 500 nəfərlik zal Heydər Əliyev Sarayının beşdə bir hissəsi qədərdir.

İLHAM ƏLİYEV: Dörddəbir hissəsi, o, 2000 nəfərlkdir!

Burada müxtəlif tədbirlər keçirmək olar. Ən gözəl səviyyədə tikilibdir. İndi tikiş fabrikinə gedib baxacağam.

MƏMMƏD MƏSMƏLİYEV: 1000 nəfər işləyəcək.

İLHAM ƏLİYEV: Bəli! Mən bilirəm, onun şəkillərini görmüşəm. Böyük istehsal sahələri var. Orada 1000 nəfər işləyəcək, özü də, bildiyimə görə, xüsusilə qadınlar işləyəcəklər. Bu da çox vacibdir.

MƏMMƏD MƏSMƏLİYEV: Yeni parklar salınır, xiyabanlar salınır. Burada bizim parkımızda indi Heydər Əliyevin büstü var. Heydər Əliyev bizim rayonda çox olubdur. Mən onun dövründə Mərkəzi Komitənin bürosu tərəfindən vəzifəyə təsdiq olunmuşdum. Həmin dövrdə “Xalqlar Dostluğu ordeni”, müxtəlif medallarla təltif edilmişəm. Mən vaxtında Heydər Əliyevə öz minnətdarlığımı bildirmişəm. Onunla uzun müddət işləmişik. Yaxşı da işləmişik. Bu işlər hamısı onun gördüyü işlərin davamıdır. Elə-belə, boş yerdən yaranmayıbdır.

Heydər Əliyevin fəaliyyəti nəticəsində görülmüş işlərdir ki, bu gün də Siz davam etdirirsiniz. Fəxr edirik ki, Heydər Əliyevin Sizin kimi davamçısı var.

İLHAM ƏLİYEV: 1970-ci illərdə Azərbaycanın uğurlu inkişafının təməli qoyulmuşdur. Buradakı fotoşəkillər də göstərir ki, nə qədər böyük işlər görülübdür. Demək olar ki, Azərbaycan yenidən tikilib. Amma sonra, 1980-ci illərin sonu - 1990-cı illərin əvvəllərində vəziyyət dəyişdi. Azərbaycan iqtisadiyyatı da bərbad vəziyyətə düşdü, sənayedə də tənəzzül, böhran başlandı. Həm də vətəndaş müharibəsi. Azərbaycan müstəqilliyə qovuşanda keçmiş Sovet İttifaqı respublikaları arasında ən ağır vəziyyətdə idi. Amma ondan sonra yenə də Heydər Əliyevin səyləri nəticəsində 1993-cü ildən 2003-cü ilə qədər inkişaf dövrü olmuşdur. Yenə Azərbaycan ayağa qalxdı, islahatlar başladı və bütün rayonlarda işlər görülməyə başlandı. O ki, qaldı son beş il ərzindəki görülən işlərə, o barədə mən çox danışmaq istəmirəm. Hər halda çalışacağam ki, bütün rayonlarda inkişaf, abadlıq, quruculuq olsun, məktəblər, xəstəxanalar, belə gözəl mərkəzlər, sənaye müəssisələri tikilsin, iş yerləri açılsın. Azərbaycanda son beş il ərzində 700 mindən artıq iş yeri açılıb və onlardan təxminən 550 mini daimi iş yerləridir. Bu, çox vacibdir. Hər yerdə yeni fabriklər, zavodlar, müəssisələr yaradılır, yollar çəkilir. Misal üçün, Bakı-Ağstafa-Qazax yolu.

MƏMMƏD MƏSMƏLİYEV: Bakıda olmuşam, gözəl yol infrastrukturu yaradılır, tıxaclar aradan qaldırılır.

İLHAM ƏLİYEV: Bakıda öz yerində. Bakı paytaxtdır, onun böyük potensialı var. Bakı, əlbəttə ki, gözəl şəhərdir, daha da gözəlləşir. Əsas Bakıdan uzaqda yerləşən rayonların inkişafına diqqət göstərməliyik. Sərhəd rayonlarına ilk növbədə, o cümlədən Ağstafa rayonuna. Mən çox şadam ki, burada işlər yaxşı gedir və yəqin son aylar ərzində böyük dəyişikliklər hiss edirsiniz. Altı aya tikiş fabriki tikilibdir. Növbəti illərdə işlər daha da sürətlə gedəcəkdir. Sizə yeni uğurlar və cansağlığı arzulayıram! Sağ olun!

Prezident təqaüdçüsü YASƏMƏN MƏMMƏDOVA: Xoş gəlmisiniz, Allah Sizə cansağlığı versin, ailəliklə xoşbəxt olun! Heydər Əliyevin qoyduğu yolu belə davam etdirin. Çox sağ olun, minnətdarıq! Bütün cavanlar, qocalar, veteranlar - hamımız Sizə cansağlığı, uzun ömür arzulayırıq.

######