AIBA və ITA antidopinq təhsili proqramını həyata keçirmək barədə razılığa gəliblər
Bakı, 13 yanvar, AZƏRTAC
Beynəlxalq Boks Assosiasiyası (AIBA) və Beynəlxalq Test Agentliyi (ITA) antidopinq təhsili proqramını həyata keçirmək barədə razılığa gəliblər.
AZƏRTAC xəbər verir ki, bu barədə AIBA-nın mətbuat xidməti məlumat yayıb.
Məlumatda bildirilib ki, 2021-ci ilin fevralında AIBA ITA ilə birlikdə qitə forumları çərçivəsində dopinqlə mübarizə üzrə genişmiqyaslı təhsil proqramına başlayacaq.
AIBA boksda müasir antidopinq proqramını təmin etmək üçün ITA ilə 2021-ci il üçün müqaviləsini yeniləyib. Müqavilə AIBA prezidenti Umar Kremlyev və ITA-nın icraçı direktoru Benjamin Koen tərəfindən imzalanıb.
U.Kremlyev qeyd edib ki, ITA ilə təkcə milli federasiya nümayəndələri üçün deyil, həm də idmançılar və məşqçilər üçün ildə ən azı dörd seminarın keçirilməsi barədə razılığa əldə edilib: “Təhsil proqramımıza fevral və mart aylarında AIBA-da onlayn təşkil ediləcək qitə forumları zamanı başlayacağıq. Mən bunu səbirsizliklə gözləyirəm, çünki antidopinq təhsili boksu təmiz idmana çevirmək üçün açardır”.
B.Koen isə bütün boks ictimaiyyətini əhatə edəcək təhsil proqramının faydalı olacağına ümid etdiyini bildirib: “ITA bir müddətdir ki, AIBA-nın antidopinq proqramını həyata keçirir. Əməkdaşlığımızın 2021-ci ildə də davam edəcəyindən məmnunuq və ümid edirik ki, təhsil proqramı faydalı olacaq. Tərəfdaşlığın uzunmüddətli olmasını təmin etmək üçün müzakirələr artıq aparılır”.
AZƏRTAC-0-
Bölmənin digər xəbərləri
