ELM VƏ TƏHSİL
AKADEMİK HƏSƏN ƏLİYEV- 95
VƏTƏN ELMİNİN FƏDAİSİ
Dekabrın 7-də Azərbaycan Dövlət Pedaqoji Universitetində görkəmli alim, ictimai-siyasi xadim, vətənpərvər ziyalı, akademik Həsən Əliyevin anadan olmasının 95 illiyinə həsr edilmiş mərasim keçirilmişdir.
Universitetdən AZƏRTAC-a bildirmişlər ki, rektor, professor Bəhlul Ağayev XX əsr Azərbaycan elminin inkişafında akademik Həsən Əliyevin əvəzsiz xidmətlərini diqqətə çatdırdı. Professor Şahəli Həsənov görkəmli alimin keçdiyi şərəfli ömür yolundan söhbət açdı. Akademik Budaq Budaqov, Dövlət Torpaq və Xəritəçəkmə Komitəsinin sədri, MEA-nın müxbir üzvü Qərib Məmmədov, MEA-nın müxbir üzvü Məmməd Salmanov, professor Nizaməddin Allahverdiyev, akademik Həsən Əliyev təqaüdçü tələbə Etibar Mehdiyev və başqaları bütün mənalı ömrünü öz doğma xalqının tərəqqisinə həsr etmiş alimin genişmiqyaslı elmi-pedaqoji və ictimai fəaliyyətindən, coğrafiya, aqrobiologiya, torpaqşünaslıq, ekologiya elmlərinin inkişafındakı rolundan danışdılar, əsərlərinin müxtəlif xarici dillərə tərcümə edildiyini bildirdilər, Azərbaycan təbiətinin qorunmasına və zənginləşdirilməsinə böyük alimin daim xüsusi diqqət və qayğı göstərdiyini vurğuladılar. Qeyd olundu ki, xalqımız böyük alimə sağlığında dərin ehtiram bəslədiyi kimi, onun xatirəsini də əziz tutub, tutur və tutacaqdır.