ALİ VƏ ORTA İXTİSAS TƏHSİLİ MÜƏSSİSƏLƏRİNDƏ SOYQIRIMI İLƏ BAĞLI TƏDBİRLƏR KEÇİRİLMİŞDİR

31.03.2006 [21:02]
Çap et
A⁺ A^-

AZƏRTAC xəbər verir ki, respublikamızın ali və orta ixtisas təhsili müəssisələrində 31 Mart - Azərbaycanlıların soyqırımı qurbanlarının xatirəsi ehtiramla yad edilmişdir.

Qafqaz Universitetində keçirilən tədbirdə bu ali məktəbin rektoru, professor Əhməd Saniç məkrli ermənilərin 1918-ci ilin martında Bakıda, Qubada, Şamaxıda və digər bölgələrdə törətdikləri qanlı cinayətlərdən danışmış, gəncləri Vətəni daim göz bəbəyi kimi qorumağa çağırmışdır.

Digər çıxış edənlər də təcavüzkarlıq siyasətini davam etdirən düşmənə tezliklə layiqli cavab veriləcəyinə əmin olduqlarını bildirmişlər.

Tədbirdə soyqırımına həsr edilmiş ədəbi-bədii kompozisiya, faciədən bəhs edən film nümayiş etdirilmişdir.

X X X

Azərbaycan Dövlət Mədəniyyət və İncəsənət Universitetində (ADMİ) soyqırımı qurbanlarının xatirəsinə həsr olunmuş anma mərasimində ADMİ-nin prorektoru, professor Rafiq Sadıqov qəsbkar ermənilərin torpaqlarımızda törətdikləri vəhşiliklərdən, dəhşətli qırğınlardan danışmış, tariximizə qanla yazılan soyqırımının heç zaman yaddan çıxmayacağını bildirmişdir.

Digər natiqlər də işğal altında qalan ərazilərimizin tezliklə azad ediləcəyinə əmin olduqlarını nəzərə çarpdırmışlar.

Sonra tələbələrin faciə ilə bağlı əldə etdikləri arxiv sənədləri videokadrlar vasitəsilə nümayiş etdirilmişdir.