Almaniya sərhədlərdə nəzarət tədbirlərini gücləndirmək istəyir
Berlin, 2 may, AZƏRTAC
Almaniyanın yeni təyin olunmuş daxili işlər naziri Aleksander Dobrindt qanunsuz miqrasiyaya qarşı sərhəd nəzarətlərinin gücləndiriləcəyini bəyan edib.
AZƏRTAC “Spiegel” qəzetinə istinadla xəbər verir ki, yeni hökumətin qanunsuz miqrasiyaya qarşı təcili tədbirlər görəcəyini deyən nazir Almaniyanın xarici sərhədlərində daha çox polis qüvvəsinin yerləşdirilməsinin planlaşdırıldığını bildirib. A.Dobrindt bu məqsədlə Avropa tərəfdaşları ilə danışıqlara başladığını və Avropa İttifaqı səviyyəsində əlavə tədbirlərin görülməsinin vacibliyini vurğulayıb.
Nazir sərhədlərin bağlanmayacağını, lakin mövcud nəzarətlərin daha ciddi həyata keçiriləcəyini qeyd edib. Onun sözlərinə görə, yeni koalisiya hökumətində bu məsələdə daha çox siyasi dəstək mövcuddur.
A.Dobrindtin açıqlamasına Polşanın narahatlığına səbəb olub. Bu ölkənin Almaniyadakı səfirliyinin müvəqqəti işlər vəkili Yan Tombinski sərhəd nəzarətinin sərtləşdirilməsinin Avropa İttifaqının daxili bazarına və gündəlik keçidlərə mənfi təsir göstərdiyini bildirib. O, Polşanın Avropa İttifaqının sığınacaq sisteminə sadiq olduğunu, lakin Şengen zonasında sərbəst hərəkət hüququnun qorunmasının vacibliyini vurğulayıb.
Xatırladaq ki, Almaniya ötən il sentyabrın 16-dan etibarən Fransa, Lüksemburq, Belçika, Danimarka və Niderland ilə sərhədlərdə yoxlamaların aparılmasına başlayıb. Polşa, Çexiya və İsveçrə ilə sərhədlərdə 2023-cü ilin oktyabrından, Avstriya ilə sərhəddə isə 2015-ci ildən yoxlamalar aparılır.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
