Almaniyada sutka ərzində koronavirusa rekord sayda yoluxma halı qeydə alınıb
Bakı, 5 noyabr, AZƏRTAC
Almaniyada sutka ərzində koronavirusa 37 min 120 yoluxma halı qeydə alınıb ki, bu da pandemiyanın başlanğıcından bəri maksimum göstəricidir.
AZƏRTAC Almaniya KİV-inə istinadla xəbər verir ki, Robert Kox İnstitutunun məlumatına əsasən, bundan əvvəlki antirekord 33 min 949 nəfərin yoluxduğu noyabrın 4-də qeydə alınmışdı.
Həmçinin son 24 saat ərzində Almaniyada COVID-19 infeksiyası səbəbindən 154 nəfər həyatını itirib.
İndiyədək ölkədə koronavirusa yoluxanların sayı 4 milyon 709 min nəfəri ötüb, ölənlərin sayı 96 min 346 nəfərə çatıb, 4 milyon 342 min nəfər isə xəstəlikdən sağalıb. Almaniya koronavirusa yoluxanların sayına görə dünyada 13-cü, ölüm hallarının sayına görə isə 14-cü yerdə qərarlaşıb.
Qeyd edək ki, noyabrın 3-də Almaniyanın səhiyyə naziri vəzifəsinin icraçısı Yens Şpan ölkəsinin pandemiyanın dördüncü dalğası ilə üzləşdiyini bildirib. Onun sözlərinə görə, bu, ilk növbədə, “peyvənd olunmayanların pandemiyasıdır”.
Bölmənin digər xəbərləri
