Almaniyada üç nəfərə qarşı Çinin xeyrinə casusluq etməklə bağlı ittiham irəli sürülüb
Berlin, 9 yanvar, AZƏRTAC
Almaniyanın Federal Prokurorluğu Çinin lehinə casusluq etməkdə şübhəli bilinən üç nəfərə qarşı ittiham irəli sürüb.
AZƏRTAC “Tagesschau”ya istinadla xəbər verir ki, həmin şəxslər 2017-2021-ci illərdə Çinin dəniz gücünün artırılması üçün faydalı ola biləcək məlumatları bu ölkənin xüsusi xidmət orqanlarına ötürmək üçün əldə etməkdə təqsirləndirilir. Həmin məlumatlara qayıq mühərrikləri, zirehli maşınlar üçün sürücülər və ya hərbi məqsədlər üçün istifadə edilə bilən dronlar daxildir. Onlar, həmçinin Çinin Dövlət Təhlükəsizliyi Nazirliyinin adından və onun vəsaiti ilə satın aldıqları üç xüsusi lazeri icazəsiz şəkildə Çinə ixrac etməkdə də təqsirləndirilirlər.
Federal Kriminal Polis İdarəsinin əməkdaşları iki kişi və bir qadını ötən il aprelin 22-də həbs ediblər.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
