ALMANİYANIN AZƏRBAYCANDAKI SƏFİRLİYİ “BEYNƏLXALQ PARLAMENT TƏQAÜDÜ” PROQRAMI ÇƏRÇİVƏSİNDƏ MÜSABİQƏ ELAN ETMİŞDİR

17.06.2008 [11:18]
Çap et
A⁺ A^-

AZƏRTAC xəbər verir ki, Almaniyanın Azərbaycandakı səfirliyi ali təhsilli azərbaycanlı gənclərin “Beynəlxalq Parlament təqaüdü” Proqramı çərçivəsində Almaniya parlamentində təcrübə, bu ölkənin Humboldt Universitetində və ya öz istəklərinə uyğun olaraq digər universitetlərdə dinləyici kursu keçməsi üçün müsabiqə elan etmişdir.

Almaniya parlamenti tərəfindən maliyyələşdirilən və Frayen, Humboldt və Texniki universitetlər tərəfindən həyata keçirilən proqram ali təhsilli, ixtisaslaşmış, siyasətlə maraqlanan gənclərin Almaniya parlament sistemini öyrənməsi məqsədini daşıyır.

Almaniya Bundestaqı sədrinin himayədarlığı altında reallaşdırılan proqram çərçivəsində 2009-cu ildə 25 ölkədən 115 nəfər, o cümlədən 5 azərbaycanlı təqaüdü almaq şansı əldə edəcəkdir.

Müsabiqədə 1979-cu il martın 1-dən sonra anadan olmuş ali təhsilli, alman dilini yaxşı bilən Azərbaycan vətəndaşları iştirak edə bilərlər.

Maraqlananlar sənədlərini 2008-ci il iyunun 30-dək səfirliyə təqdim etməlidirlər.