AMEA-nın Aşqarlar Kimyası İnstitutu beynəlxalq səviyyəli tədqiqatlara başlayıb
Bakı, 28 mart, AZƏRTAC
Azərbaycan Milli Elmlər Akademiyasının (AMEA) akademik Əli Quliyev adına Aşqarlar Kimyası İnstitutu Belarus Bioloji Aktiv Birləşmələrin Biokimyası İnstitutu ilə birgə beynəlxalq səviyyəli tədqiqatlara başlayıb.
İnstitutun Gənc Alim və Mütəxəssislər Şurasının sədri, kimya üzrə fəlsəfə doktoru, dosent Əfsun Sucayev AZƏRTAC-a açıqlamasında bildirib ki, elmi işlər hər iki elmi müəssisənin bir yerdə həyata keçirdiyi “Bioloji fəal maddələrin sintezi, kimyəvi modifikasiyası və onların əsasında bioloji aktiv əlavələr və dərmanların yaradılması” layihəsi çərçivəsində aparılır. Əsas məqsəd tibdə tətbiq olunması mümkün olan, tərkibində azot və kükürd atomları saxlayan yeni bioloji fəal maddələrin sintezi və funksional xassələrinin tədqiqi, onlar əsasında yeni, daha təsirli bioloji fəal əlavələr və dərman preparatların yaradılmasıdır. Artıq bu istiqamətdə yeni fizioloji fəal maddələr sintez olunub, onların heyvanlar üzərində klinik sınaqlara qədərki analizlərin aparılması üçün 2 seçilmiş nümunə Belarus Respublikasının Qrodno şəhərində yerləşən Bioloji Aktiv Birləşmələrin Biokimyası İnstitutuna göndərilib və artıq laboratoriya sınaqlarına başlanılıb. Əldə olunacaq mühüm nəticələr məqalə şəklində nüfuzlu jurnallarda dərc olunacaq.
Alim vurğulayıb ki, bu istiqamətdə aparılan elmi tədqiqatların nəticəsi yüksək təsirli dərman preparatlarının istehsalının təşkilinə öz töhfəsini verə bilər.
Bölmənin digər xəbərləri
