AMEA-nın Naxçıvan Bölməsində Müstəqillik Gününə həsr olunmuş elmi konfrans keçirilib
Naxçıvan, 27 may, AZƏRTAC
AMEA-nın Naxçıvan Bölməsində “28 May – Müstəqillik Günü” mövzusunda elmi konfrans keçirilib.
Bölmənin mətbuat xidmətindən AZƏRTAC-ın bölgə müxbirinə bildirilib ki, konfransda akademik İsmayıl Hacıyev müstəqillik, ərazi bütövlüyü və suverenlik anlayışlarının xalq üçün önəmindən, Azərbaycan Xalq Cümhuriyyətinin dövlətçilik tariximizdəki yerindən danışıb. AXC-nin təkcə Azərbaycanın deyil, bütün Şərq dünyasının ilk demokratik, hüquqi və dünyəvi dövləti olduğunu vurğulayıb.
Bildirib ki, cəmi 23 ay fəaliyyət göstərməsinə baxmayaraq, Azərbaycan Xalq Cümhuriyyəti qısa müddətdə bir çox mühüm islahatlar həyata keçirib.
İsmayıl Hacıyev, həmçinin Azərbaycana rəhbərliyinin birinci dövründə Ulu Öndər Heydər Əliyevin xalqı müstəqilliyə hazırlamaq üçün yürütdüyü siyasətdən, ölkədə ikinci dəfə siyasi hakimiyyətə qayıtmasından sonra müstəqilliyimizin möhkəmləndirilməsi istiqamətində gördüyü işlərdən bəhs edib. O, Heydər Əliyev siyasi xəttinin dövlət başçısı İlham Əliyev tərəfindən uğurla davam etdirilməsindən də danışıb.
Tarix, Etnoqrafiya və Arxeologiya İnstitutunun əməkdaşlarından Əli Tağıyev “Azərbaycan Xalq Cümhuriyyətinin yaradılmasına gedən yol”, Səfər Əliyev “Azərbaycan Xalq Cümhuriyyətinin yaradılması və fəaliyyəti”, İncəsənət, Dil və Ədəbiyyat İnstitutunun aparıcı elmi işçisi, filologiya üzrə fəlsəfə doktoru, dosent Çinarə Rzayeva “Cümhuriyyət dövründə ədəbiyyat və dil siyasəti” mövzusunda məruzə ediblər. Məruzələrdə XIX əsrin sonu – XX əsrin əvvəllərində Azərbaycanda, eləcə də qonşu ölkələrdə baş verən ictimai-siyasi proseslərə nəzər salınıb, milli oyanış hərəkatının Cümhuriyyətin qurulmasında oynadığı mühüm rol vurğulanıb.
Konfransda, həmçinin Azərbaycan Xalq Cümhuriyyəti dövründə ana dilinə verilən önəmdən də bəhs olunub.
Sonra konfrans iştirakçılarını maraqlandıran suallar cavablandırılıb.
Bölmənin digər xəbərləri
