AMERİKA ALİMLƏRİ AY SÜXURUNDA SU AŞKAR ETMİŞLƏR
AZƏRTAC xəbər verir ki, Amerikanın Braun Universitetinin alimləri ay süxurunda su aşkar etmişlər. Hələ 1969-1972-ci illər arasındakı dövrdə Aydan Yer kürəsinə “Apollon” gəmisinin heyəti tərəfindən gətirilmiş süxurun tərkibində su var idi, lakin gözlənilməz tapıntı yalnız indi mümkün olmuşdur.
Bir qrup Amerika geoloqu müəyyən etmişdir ki, Ayın mövcüd olduğu ilk mərhələlərdə onun dərinliklərindən səthinə külli miqdarda su çıxırmış. Lakin milyon illər ərzində su, demək olar ki, tamamilə buxarlanmışdır.
Amerika alimləri həmçinin sübut etmişlər ki, Ayda əzəldən hidrogen olmuşdur. Bununla da onlar Ayda hidrogen birləşmələrinin yadplanetli mənşəyi haqqında fərziyyəni təkzib etmişlər.
Bu vaxtadək alimlər hesab edirdilər ki, əmələ gəldiyi andan, yəni təqribən 4 milyard il əvvəl Yer kürəsindən qopub ayrıldığı vaxtdan Ayda su yoxdur (kosmik mənşəli buz istisna olmaq şərtilə). Ayda suyun axtarışlarını davam etdirmək üçün yaxın vaxtlarda NASA-nın kosmik zondu Aya yola düşəcək, Ay kraterlərində buz aşkar etməyə cəhd göstərəcəkdir.
Bölmənin digər xəbərləri
