AMERİKA KONQRESMENLƏRİ HESAB EDİRLƏR Kİ, AYIN FƏTHİNDƏ ÇİN ABŞ-I QABAQLAYA BİLƏR
“Speys nyus” həftəliyi ABŞ Konqresi nümayəndələr palatasının üzvü Tom Dileyin bu sözlərini misal gətirir: “Hazırda bizimlə Çin arasında əsil kosmik yarış gedir”. Dileyin sözlərinə görə, Pekinin öz kosmonavtlarını 2017-ci ildə Aya çıxarmaq niyyəti qanunvericiləri lap pərt etmişdir. Axı, ABŞ bunu bir il sonra etməyi planlaşdırır. Konqresmen Frənk Vulf isə deyir ki, əgər Çin bizi qabaqlasa, onda biz kosmosda liderliyimizi itirəcəyik.
Ötən həftə konqresmenlər təxsisat komitəsində NASA-nın direktoru Maykl Qriffini qısnayaraq, Pekinin öz niyyətini doğrudanmı həyata keçirəcəyi barədə sorğu-suala tutmuşlar. Qriffin açıq cavabdan yayınsa da, etiraf etmişdir ki, çinlilərin kosmonavtları Aya çatdırmağa qadir modulu var. O demişdir: “Onların “Şençjou” gəmisi həm də adamları Yerə sağ-salamat qaytara bilər. Bizim şattlear (dəfələrlə istifadə edilən kosmik gəmilər) bunu edə bilmir. Yeni gəmimiz isə hələ layihələşdirmə mərhələsindədir”. Doğrudur, Qriffin əlavə etmişdir ki, gəmini Ay orbitinə çıxarmaq üçün çinlilərin güclü daşıyıcı raketləri yoxdur. Amma belə raket ABŞ-da da yoxdur.
Qriffinin sözlərinə görə, hazırda Çinin kosmik proqramı üçün 200 minədək mühəndis və alim işləyir. NASA isə indiki büdcəsi ilə bu işə 75 min adam cəlb edə bilər.
Konqresmenlər Qriffinə tapşırmışlar ki, Çinin kosmosda uğurları, Rusiyanın və Hindistanın kosmik proqramları haqqında bir aydan sonra məruzə təqdim etsin.
Bölmənin digər xəbərləri
