Anar Bağırov: Məqsədimiz odur ki, vəkillər daim keyfiyyətli hüquqi yardım göstərsinlər
Bakı, 10 oktyabr, AZƏRTAC
Son illərdə vəkillik sahəsində aparılan islahatlar və inkişaf onu deməyə əsas verir ki, vəkillik ölkədə aparılan müasir məhkəmə hüquq islahatlarında fəal rol oynamağa çalışır. Təbii ki, dövlətin dəstəyi olmadan bütün bu işlərin görülməsi qeyri-mümkün olardı.
AZƏRTAC xəbər verir ki, bunu Vəkillər Kollegiyasının Rəyasət Heyətinin sədri Anar Bağırov Milli Məclisin oktyabrın 10-da keçirilən plenar iclasında çıxışı zamanı deyib.
O, həmçinin bildirib: “Əsas məsələ ondadır ki, Azərbaycan gəncləri vəkilliyə üz tuturlar. Əvvəllər bir qayda olaraq, daha çox bizim böyük hörmət bəslədiyimiz yaşlı nəslin nümayəndələri vəkilliyə müraciət edirdilər. Bu gün isə hətta dövlət qurumlarında çalışan hüquqşünaslar belə vəkilliyə maraq göstərirlər. Düzdür, vəkillərin sayı hələ də bizi tam qane etmir. Mən də razıyam ki, bu say azdır və artırılmalıdır. Ancaq nəzərə almaq lazımdır ki, problemin əsas səbəblərindən biri ölkədə hüquqşünasların ümumi sayının az olmasıdır. Biz adıçəkilən ölkələrlə müqayisə aparmışıq və məlum olub ki, həmin ölkələrdə hüquqşünas məzunların sayı vəkillərin sayından bir neçə dəfə çoxdur. Burada əsas məqam isə ondan ibarətdir ki, biz çalışırıq, ən savadlı, ən keyfiyyətli təhsilli insanlar vəkil olsunlar. Bizdə çox şəffaf və mərhələli qəbul prosesi mövcuddur. Yazılı test imtahanı, şifahi müsahibə, tədris mərhələsi. Yəni, məqsədimiz odur ki, vəkillər daim peşə hazırlıqlarını artırsın və keyfiyyətli hüquqi yardım göstərsinlər”.
Bölmənin digər xəbərləri
