Asiya İnfrastruktur İnvestisiya Bankı Şri-Lankaya və Laosa kredit ayırıb
Pekin, 4 aprel, AZƏRTAC
Azərbaycanın təsisçi-üzv olduğu Asiya İnfrastruktur İnvestisiya Bankının (AİİB) Direktorlar Şurası Şri-Lankaya və Laosa kredit ayrılmasını təsdiqləyib.
Bankın Pekindəki mənzil-qərargahından AZƏRTAC-a bildiriblər ki, AİİB Şri-Lankanın Kolombo şəhərində yaşayan aşağı gəlirli sakinlərin ev şəraitinin yaxşılaşdırılması layihəsinə 200 milyon, ölkədə torpaq sürüşməsi təhlükəsi olan ərazilərdə risklərin və zərərin azaldılması layihəsinə isə 80 milyon ABŞ dolları ayırıb. Bu, bankın Şri-Lankaya ayırdığı ilk kreditlərdir.
AİİB-in Laosa ayırdığı 40 milyon dollarlıq ilk kredit isə təxminən yarım milyon sakinin yaşadığı ərazilərdə 58 kilometrlik avtomobil yollarının bərpasına yönəldiləcək. Layihə Vientian vilayətində 11 rayonun və 471 kəndin yol təsərrüfatının inkişafına xidmət edir.
Qeyd edək ki, AİİB 100 milyard dollar nizamnamə kapitalı ilə Asiyada enerji, nəqliyyat, şəhərsalma, su təchizatı, logistika, telekommunikasiya, kənd təsərrüfatı, ətraf mühit və digər sahələr üzrə infrastruktur layihələrini maliyyələşdirir. Bank fəaliyyətə başladığı vaxtdan indiyədək Azərbaycan da daxil olmaqla, müxtəlif ölkələrə 39 layihəyə, ümumilikdə, 7,94 milyard dollar kredit ayırıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
